भक्तपुर र ललितपुरका सडक दुर्घटनामा दुईजनाको मृत्यु

काठमाडौं- भक्तपुर र ललितपुरमा भएका छुट्टाछुट्टै दुर्घटनामा दुईजनाको ज्यान गएको छ। भक्तपुरको च्यामासिं र ललितपुरको बागडोलमा दुर्घटना भएको हो।

च्यामासिंमा बस र मोटरसाइकल ठोक्किँदा एक जनाको ज्यान गएको छ भने एक जना घाइते भएका छन्। सोमबार बेलुका ८ बजे बा ३ ख ४७६५ नम्बरको बस र बा ६१ प ६६१८ नम्बरको मोटरसाइकल ठोक्किँदा मोटरसाइकलको पछाडि बस्ने दोलखाका ३४ वर्षका देवेन्द्र कार्कीको ज्यान गएको प्रहरीले जनाएको छ।

मोटरसाइकलका चालक घाइते भएका छन्। उनको मध्यपुर थिमि अस्पतालमा उपचार भइरहेको छ। बस चालकलाई पक्राउ गरेको प्रहरीले जनाएको छ।  

त्यसैगरी ललितपुरमा सडक छेउको रेलिङमा मोटरसाइकल ठोक्किँदा चालकको ज्यान गएको छ। गएराति साढे १० बजे  ललितपुरको बागडोलमा बागमती प्रदेश ०२–०३० प ९४८३ नम्बरको मोटरसाइकल सडक छेउको रेलिङमा ठोक्किँदा चालक बाँकेका ३० वर्षका गणेशकुमार थारुको ज्यान गएको प्रहरीले जनाएको छ।

दुर्घटनामा गम्भीर घाइते भएका थारुको उपचारका क्रममा राति साढे ११ बजे पाटन अस्पतालमा ज्यान गएको हो।