यात्रुबिनै रेल गुडाइँदै, दुई देशका प्रधानमन्त्रीले उद्घाटन गरेपछि नियमित सेवा

काठमाडौं– लामो समयदेखि सञ्चालनको पर्खाइमा रहेको जनकपुर–जयनगर रेल सेवा सञ्चालन हुने भएको छ।

रेल सञ्चालनको समय पटक–पटक तोकिए पनि त्यो समय घर्किंदै आएको थियो। नेपाल सरकारले बोगीसहितका दुई रेल खरिद गरेको झन्डै १५ महिनापछि रेल सेवा सञ्चालन हुन लागेको हो।

नियमित रेल सेवा सञ्चालन गर्न आज यात्रुबिना गुडाइएको छ। रेल्वे कम्पनीका महाप्रबन्धक नीरञ्जन झाले भने, ‘आजदेखि नियमित रूपमा दैनिक एक पटक कुर्था–जयनगरसम्म रेल ओहोरदोहोर गर्नेछ, तर तत्काल यात्रु बिनाको ड्राइ रन मात्र हुन्छ।’ केही दिनमा नेपाल र भारतका प्रधानमन्त्रीले संयुक्त रूपमा उद्घाटन गरेपछि मात्रै यात्रुलाई राखेर दैनिक तीन पटक सेवा सञ्चालन गर्ने उनले जनाए।

रेल सञ्चालनका लागि चालकसहितका प्राविधिक कर्मचारी भारतीय रेल कम्पनी केआरसीएल कम्पनीसँग दुई पक्षीय जिटुजी सम्झौता भएको महाप्रबन्धक झाले बताए। बाँकी प्रशासनिक तथा सहयोगी गरी ६५ कर्मचारी नेपाल रेल्वे कम्पनीले भर्ना गरी उनीहरूलाई तालिमसमेत दिई तयार गरिसकेको महाप्रबन्धक झाले जानकारी दिए।