स्थानीय चुनावका लागि जनमत पार्टीका अध्यक्ष राउतले मागे उम्मेदवारको नाम

जनकपुरधाम– सरकारले आगामी वैशाख ३० गतेका लागि स्थानीय तह निर्वाचनको मिति घोषणा गरेसँगै राजनीतिक दलहरु निर्वाचनको तयारीमा जुटेका छन्। सीके राउत नेतृत्वको जनमत पार्टीले पनि निर्वाचनका लागि तयारी थालेको छ। 

पार्टी अध्यक्ष राउतले उम्मेदवार सिफारिस–स्वघोषणा पठाउन परिपत्रमार्फत अनुरोध गरेका छन्। अध्यक्ष राउतले मंगलबार मातहतका कमिटीहरूलाई एक परिपत्र गर्दै यस्तो आग्रह गरेका हुन्। 

‘याद रहोस्, यो केवल सिफारिस हुनेछ, अन्तिम निर्णय होइन,’ उनले भनेका छन्, ‘अन्तिम निर्णय केन्द्रीय कार्यकारिणी समितिले विभिन्न च्यानलबाट आएका सबै सिफारिसलाई मूल्याङ्कन गरेर गर्नेछ।’ 

जनमतले जिल्ला कार्यकारिणी समितिहरुले आगामी फागुन ५ गतेसम्ममा उम्मेदवारहरूको नाम सिफारिस गरिसक्न भनेको छ भने वडा–पालिका कार्यकारिणी समितिहरुले फागुन १५ गतेसम्म सिफारिस पठाउन सक्ने परिपत्रमा उल्लेख छ।

त्यस्तै, कभरेज–मजबुत अभियानका पर्यवेक्षकले सिफारिस पठाउने अन्तिम मिति फागुन ५ गतेका लागि निर्धारण गरिएको छ। 

विभिन्न समितिहरूको सिफारिसका अलावा उम्मेदवारहरूले आफ्नो उम्मेदवारीको स्वघोषणा समेत गरेर सोही फारममा पठाउन सक्ने परिपत्रमा उल्लेख छ।