सरस्वतीको मूर्ति सेलाउन जाने क्रममा झडप

काठमाडौं– रौतहटको इशनाथ नगरपालिकामा सरस्वतीको मूर्ति सेलाउन जाने क्रममा झडप भएको छ। इशनाथ–५ लक्ष्मीनिया गाउँमा पूजापछि विद्यार्थीहरुले सरस्वतीको मूर्ति सेलाउन जाँदा फरक समुदायका महिलाबाट अवरोध भएपछि झडप भएको बताइएको छ।

महिलाहरुले गरेको ढुंगामुढा प्रहारबाट दुईजना प्रहरीलाई चोटपटक लागेको रौतहट प्रहरीले जनाएको छ। सरस्वतीको मूर्ति सेलाउने क्रममा हुन सक्ने सम्भावित झडपलाई मध्यनजर गर्दै दुई दिनअघि रौतहटका प्रजिअ कृष्णबहादुर शाहीको रोहवरमा दुईपक्षीय छलफल भएको थियो।

छलफलमा मूर्ति लिएर मदरसाको अगाडिबाट जाँदा बाजा नबजाउन भएको सहमति अनुसार नै जाँदा केही महिलाले ढुंगामुढा गरेको प्रहरीको भनाइ छ। 

भारत र नेपालको सिमाना जोडिएको उक्त क्षेत्रमा प्रत्येक वर्ष सरस्वती पूजा र झण्डी पूजामा विवाद हुँदै आएको छ।