कर्णालीका पाँच मन्त्रीले लिए शपथ

सुर्खेत- कर्णाली प्रदेश सरकारका नवनियुक्त पाँच जना मन्त्रीले पद तथा गोपनीयताको शपथ लिएका छन्। जसमा नेपाली कांग्रेसबाट सुर्खेतका यज्ञबहादुर बुढाक्षेत्री र दैलेखका हिमबहादुर शाही, माओवादी केन्द्रबाट गैरसांसद हुम्लाका कार्चेन लामा, जाजरकोटका गणेशप्रसाद सिंह र नेकपा एकीकृत समाजवादीबाट जुम्लाका पदमबहादुर रोकाया मन्त्री बनेका छन्। 

बुढाक्षेत्री सामाजिक विकास मन्त्री, शाही आन्तरिक मामिला तथा कानून मन्त्री, लामा उद्योग, पर्यटन, वन तथा वातावरण मन्त्रालय, सिंह जलस्रोत तथा ऊर्जा मन्त्री र रोकाया भौतिक पूर्वाधार तथा सहरी विकास मन्त्रीको रुपमा पद तथा गोपनियताको सपथ लिएका छन्।

उनीहरुलाई प्रदेश प्रमुख तिलक परियारले पद तथा गोपनीयताको शपथ खुवाएका हुन्। योसँगै कर्णाली प्रदेश सरकारले पूर्णता पाएको छ। गएको कार्तिक १६ गते नेपाली काँग्रेस संसदीय दलका नेता जीवनबहादुर शाही मुख्यमन्त्री बनेका थिए। 

यसअघि माओवादीका विन्दमान विष्ट आर्थिक मामिला तथा योजनामन्त्री र एकीकृत समाजवादीबाट दलका नेता चन्द्रबहादुर शाही भूमि व्यवस्था, कृषि तथा सहकारी मन्त्री बनिसकेका छन् ।