ओलीले राजपाका नेतालाई भने- 'आन्दोलन छाडेर विकासमा लाग्‍नूस्'

काठमाडौं- प्रधानमन्त्री केपी शर्मा ओलीले आन्दोलन छाडेर विकासको काममा लाग्न राजपाका नेताहरूसँग आग्रह गरेका छन् । बिहीबार साँझ बालुवाटारमा भएको भेटमा ओलीले आन्दोलन छाडेर तराईको समग्र विकासका बृहत् योजना बनाउन आग्रह गरेका हुन् । 

तराईको विकास, चुरे संरक्षणको ठोस कदम, तटबन्धन, उद्योग स्थापना आदिका लागि बृहत योजना बनाउन प्रधानमन्त्रीले आग्रह गरेको उनका प्रेस संयोजक चेतन अधिकारीले जानकारी दिए । ओलीले तराईको विकासका लागि मानसिकता पनि परिवर्तन गर्नुपर्नेमा जोड दिएका थिए । 

सुगम ठाउँ भएर पनि न्यून साक्षरता दर, विभिन्न सामााजिक विकृतिबाट तरार्इका जनतालाई मुक्त पार्नुपर्ने उनल बताए । ओलीले भने, 'यी सबै समस्या समाधानका लागि राजनीतिक रूपमा योजना बनाऔं र कार्यान्वयन गरौं ।' अघिल्लो सरकारका बेला अघि सारेको जनता आवास कार्यक्रम प्रभावकारी नभएकाले त्यसको साटो तराईमा पनि एकीकृत बस्ती बसाउने सरकारको योजना रहेको उनले नेताहरूलाई जानकारी गराए । 

राजपाका अध्यक्ष मण्डलका सदस्य महन्थ ठाकुरले प्रधानमन्त्री ओलीलाई ज्ञापन पत्र बुझाएका थिए । प्रधानमन्त्री ओलीले ज्ञापन पत्र हेरेपछि राजपाले पहिला उठाएका कतिपय माग असान्दर्भिक भइसकेको प्रतिक्रिया दिएका थिए । 'हिजोका कतिपय माग आज असान्दर्भिक भइसकेका छन् । त्यसमा तपाईंहरूले पनि पुनर्विचार गर्नुहोस्,' प्रधानमन्त्री ओलीले भने ।

संविधान संशोधनका बारेमा नेताहरूले राखेका जिज्ञासामा प्रधानमन्त्रीले आवश्यकता र औचित्यका आधारमा संविधान संशोधन हुने बताएका थिए ।

राजपामा नेताहरूले तराइको बाढी, दुई वर्षअघिको आन्दोलनका घाइतेको अवस्था, तरार्इको विकास, मधेस र थारू आन्दोलनको छानविनका लागि बनेको आयोगको प्रतिवेदन र संविधान संशोधनका विषयमा प्रधानमन्त्रीको धारणा माग गरेका थिए ।