गुठी संस्थानका कर्मचारी राउत घुससहित पक्राउ

महोत्तरी- महोत्तरी सदरमुकाम जलेश्वरस्थित गुठी संस्थान कार्यालयबाट एक कर्मचारी घुससहित पक्राउ परेका छन्। अख्तियार दुरुपयोग अनुसन्धान आयोगको कार्यालय बर्दिवासले संस्थानको शाखा कार्यालयमा असुली सहायक जयकुमार राउत शर्मालाई घुससहित पक्राउ गरेको हो। 

शर्मालाई सेवाग्रहीसँग ३५ हजार नगद घुस लिइरहेको अवस्थामा पक्राउ गरिएको अख्तियारको बर्दिवास कार्यालय प्रमुख एसपी प्रवीण पोखरेलले जानकारी दिए।
शर्माले गुठी संस्थान अधिनस्त जग्गाको धितो फुकुवा गराइदिने भन्दै सेवाग्रहीसँग घुस रकम माग गरेका थिए। 

सेवाग्रहीले दिएको सूचनाको आधारमा पक्राउ गरिएको कार्यालयले जनाएको छ। करार सेवामा कार्यरत शर्मामाथि थप अनुसन्धान भइरहेको प्रमुख पोखरेलले बताए।