सरकारसँग झुकेर काठमाडौं जान तयार भएको होइन : डा. केसी

काठमाडौं- जुम्लामा आमरण अनशनरत डा. गोविन्द केसीले सरकारसँग झुकेर काठमाडौं जान तयार नभएको बताएका छन् । डा. केसीका सहयोगी विशद दाहालका अनुसार जुम्लामा नरसंहार मच्चिन नदिन मात्र आफू काठमाडौं जान तयार भएको उनले बताए । 

'म सरकारसँग डराएर र झुकेर काठमाडौं जान तयार भएको होइन,' डा. केसीले सहयोगीहरूसँग भने, 'म सरकारको प्रतिवाद गर्दै काठमाडौं जान तयार छु । सरकारले शुरु गरेको नरसंहार मेरो कारणले भयो भने मलाई आत्मग्लानी हुन्छ ।' सरकारको हेलिकोप्टरमा आफू काठमाडौं नजाने उनले स्पष्ट पारेका छन् । 

कर्णाली स्वास्थ्य विज्ञान प्रतिष्ठानको स्थिति तनावपूर्ण छ । 'एक चरणको नरसंहार मच्चाएर अहिले सरकार पछाडि हटेको छ,' दाहालले नेपाल समयसँग भने, 'फेरि पनि आक्रमण गर्नलाई प्रहरी तम्तयार अवस्थामा बसेको छ ।' 

अनशनस्थलमा प्रहरीले अन्धाधुन्द लाठीचार्ज, अश्रु ग्यास र सिसाको गोली प्रहार गर्दा करिब ४० जना घाइते भएको दाहालले जानकारी दिए । घाइते हुनेहरूमा चिकित्सक, नर्स, विद्यार्थी र अस्पताल कर्मचारीहरू छन् । उनीहरूलाई प्रहरीले अन्धाधुन्द पिटेको छ । अस्पतालभरि अश्रु ग्यास फैलिएको छ । अश्रु ग्यासका कारण धेरै जना बेहोस भएका छन् । 

प्रहरीकै गोली लागेर एक प्रहरी जवान घाइते भएका छन् । अस्पताल परिसरमा सिसाका गोली र खोका छरिएका छन् ।