विशेष मौसम बुलेटिन : बिहीबारदेखि शनिबारसम्म वर्षाको सम्भावना

काठमाडौं– यो साताभरि मौसममा सुधार नहुने जल तथा मौसम विज्ञान विभागले जनाएको छ।

विभागले आज मंगलबार विशेष मौसम बुलेटिन जारी गर्दै न्यून चापीय प्रणालीका कारण आगामी शनिबारसम्म देशका विभिन्न स्थानमा वर्षा र हिमाली क्षेत्रमा हिमपातको सम्भावना रहेको जनाएको हो।

विभागका अनुसार बिहीबार सुदूरपश्चिम, कर्णाली, लुम्बिनी, गण्डकी, बागमती र प्रदेश नम्बर १ का उच्च पहाडी र हिमाली भूभागका विभिन्न स्थानमा हल्का हिमपात तथा पहाडी र तराईका धेरै स्थानमा मेघ गर्जनसहित हल्कादेखि मध्यम वर्षाको सम्भावना छ।

त्यसैगरी शुक्रबार देशका उच्च पहाडी र हिमाली स्थानमा हल्कादेखि मध्यम हिमपात तथा देशका पहाडी र तराईका धेरै स्थानमा मेघ गर्जनसहित चट्याङ र असिना एवं हल्कादेखि मध्यम वर्षा हुने अनुमान छ। गण्डकी र लुम्बिनीका एक दुई स्थानमा भारी वर्षा समेत हुन सक्ने पूर्वानुमान विभागको छ। शनिबार भने गण्डकी, बागमती र प्रदेश नम्बर १ का विभिन्न स्थानमा हल्कादेखि मध्यम वर्षा हुने अनुमान छ।

अहिलेको मौसमी प्रणाली आइतबारदेखि कमजोर हुँदै जाने र त्यसपछि मात्रै मौसम खुल्ने विभागले बताएको छ। चिसोबाट बच्न र हिमपातबाट हुन सक्ने प्रभावबाट जोगिन विभागले सबैलाई सतर्क पनि गराएको छ।