यस्तो छ २० दिनदेखि अनशनरत डा केसीको अवस्था 

काठमाडाैं- जुम्लामा २० दिनदेखि अनशन बस्दै आएका डा गोविन्द केसीको अवस्था जटिल बन्दै गएको चिकित्सकहरुले बताएका छन् । डा केसीको उपचारमा संलग्न डा विसब दाहालका अनुसार उनको शरिरमा संक्रमण बढ्दै गएको छ भने मुटुको चाल अनियन्त्रित बन्दै गएको छ । 

घाँटी र हातको नसाबाट सुरु भएको संक्रमण बुधबारबाट स्लाइन चढाउन खोलिएको दोस्रो हातमा पनि फैलिएको छ । संक्रमणका कारण हात सुन्निएको डा दाहालले जानकारी दिए ।  
उनका अनुसार नसामा संक्रमण बढेसंगै शरिरमा सेतो रक्तकोषिकाको संख्या घट्दै गएको छ । रगतमा सेतो रक्तकोषिकाको संख्या घट्दै गएपछि शरीरमा कीटाणुसँग लड्न सक्ने क्षमता कम हुँदै गएको छ । 

सेतो रक्तकोषिका घटेको अवस्थामा शरीरभर संक्रमण फैलिएर सेप्सिस हुने सम्भावना उच्च रहेको डा दाहालले जानकारी दिए । अहिले डा केसीमा सेप्सिसका प्रारम्भिक लक्षण देखिन थालेको चिकित्सकहरूले बताएका छन् । 

रगतबाट फैलिएको सेप्सिसका कारण मिर्गौला, कलेजो, फोक्सोलगायत अंगले बिस्तारै काम गर्न छाड्छन् । केही दिनमै बिरामीको मृत्यु हुन सक्ने चिकित्सकहरु बताउँछन् । 

डा केसीको अवस्था जटिल बन्दै गएपनि उनको माग सम्बोधन गर्ने विषयमा सरकार उदासिन बन्दै गएको छ । मंगलबार भएको तीन चरणको वार्ता कुनै निष्कर्शमा पुग्न नसकेपछि बुधबारबाट वार्ता प्रत्रृmया नै अवरुद्ध भएको छ । डा केसीेले कर्मचारी स्तरको वार्ता टोलीसंग कुराकानी गरेर टुङ्गो नलाग्ने भन्दै वार्तामा नबस्ने अडान लिएपछि थप छलफल हुन नसकेको हो । 

डा केसीेले बुधबार एक विज्ञप्ति जारी गर्दै तत्काल चिकित्सा शिक्षा विधेयक फिर्ता लिनु पर्ने, मन्त्रीस्तरिय वार्ता टोली बनाउनु पर्ने माग अघि सारेका छन् । उनको माग सम्बोधन नगरि सरकारले उनलाई उपचारका लागि काठमाडौं ल्याउने तयारी गरेको छ । अाजै उनलाई काठमाडाैं ल्याने तयारी भएकाे स्रोतले जनाएको छ ।

डा केसी पक्षका वार्ता टोली सदस्य अधिवक्ता ओमप्रकाश अर्यालले सरकारले डा केसीको माग सुनवाई नगरि विरामीसंग जस्तो व्यबहार गरेको बताए । डा केसीलाई तलमाथि भए त्यसको सम्पूर्ण दोष प्रधानमन्त्री केपी ओलीमाथि थोपरिने उनले बताए ।