'अपत्यारिलो अभियोग' लागेका रायभरलाई धरौटीमा रिहा गर्न सर्वोच्चको आदेश

काठमाडौं– 'अपत्यारिलो अभियोग' लगाएर पुर्पक्षका लागि कारगार पठाइएका एक युवालाई धरौटीमा रिहा गर्न सर्वोच्च अदालतले आदेश दिएको छ। सर्वोच्चका न्यायाधीश विश्वम्भरप्रसाद श्रेष्ठ र सपना प्रधान मल्लको संयुक्त इजलासले उनलाई २५ हजार धरौटीमा रिहा गर्न आदेश दिएको हो। 

२८ करोड रुपैयाँ राजस्व छली गरेको अभियोग लगाएर उमाशंकर रायभरलाई पुर्पक्षका लागि थुनामा पठाइएको थियो। उनको नागरिकता दुरुपयोग गर्दै कम्पनी खडा गरी राजस्व छली भएको थियो। 

यसअघि उच्च अदालत पाटनले ७५ लाख धरौटी माग गर्ने आदेश गरेको थियो। तर उक्त रकम बुझाउन नसकेपछि उनी थुनामुक्त हुन सकेका थिएनन्। पाटनको उक्त आदेश बदर गर्दै सर्वोच्चले २५ हजार कायम गरिदिएको हो। 

फागुन १९ देखि ललितपुरको नख्खु कारागार चलान भएका थिए। 

बाराको परवानीपुर–१ मा ऐलानी जग्गामा झुप्रो मात्र बनाउन सकेका उनले यति ठूलो रकम छली गर्न 'असम्भव' भएको तर अदालत र राजस्व अनुसन्धान विभागको कमजोरीका कारण मुद्दा चलाइएको भन्दै विरोध भएको थियो।