धादिङमा फेरि गयो भूकम्प

काठमाडौं- धादिङमा फेरि भूकम्प गएको छ । मंगलबार राति १० बजेर ५२ मिनटमा धादिङ केन्द्रविन्दु भएर ४ दशमलव ४ रेक्टर स्केलको भूकम्प गएको हो । 

भूकम्प आएपछि रातको समयमा स्थानीय बासिन्दा घरबाहिर निस्केका थिए । एक महिनामा तीन पटक भूकम्प गएपछि धादिङवासी त्रसित बनेका छन् । 

राष्ट्रिय भूकम्प मापन केन्द्रका अनुसार यो नयाँ भूकम्प नभई गोर्खा भूकम्पकै परकम्प हो । १२ वैशाख ०७२ मा गोरखाको बारपाक केन्द्रविन्दु भएर गएको ७ दशमलव ८ रेक्टर स्केलको भूकम्पकै परकम्प भएको केन्द्रका प्रमुख लोकविजय अधिकारीले जानकारी दिए ।