जंगी अड्डामा नवनियुक्त रक्षा सचिव

काठमाडौं- रक्षा मन्त्रालयका नवनियुक्त सचिव किरणराज शर्माले सोमबार सैनिक मुख्यालयको भ्रमण गरेका छन्। यसअघिका रक्षा सचिव वेगेन्द्रराज पौड्यालले अनिवार्य अवकाश पाएपछि उनको ठाउँमा आइपुगेका शर्मालाई सेनाले जंगीअड्डामा स्वागत गरेको हो। 

जंगी अड्डास्थित सगरमाथा हलमा आयोजित स्वागत कार्यक्रममा रक्षा सचिव शर्मालाई वर्तमान वस्तुस्थिति, सेनाको संगठनात्मक संरचना, जिम्मेवारी, अपरेशनल गतिविधि, कल्याणकारी कार्य लगायत नेपाली सेना सम्बन्धी अन्य विविध विषयहरुमा जानकारी गराइएको थियो। 

कार्यक्रमपूर्व सचिव शर्माले प्रधानसेनापति प्रभुराम शर्मासँग भेटघाट समेत गरेका थिए। सचिव शर्मा यसअघि वाग्मती प्रदेश सरकारका प्रमुख सचिव थिए। रक्षा सचिव जंगी अड्डाभित्र रहेको सैनिक विशेष अदालतको सदस्य अर्थात् न्यायधिश समेत रहने व्यवस्था छ। 

नवनियुक्त शर्मा गत ३१ असारमा सचिवमा बढुवा भएका थिए। यसअघि २०६९ सालमा उनी सहसचिवमा नियुक्त भएका थिए। ०५१ सालमा लेखा अधिकृतबाट निजामती सेवामा प्रवेश गरेका उनी सूचना विभागको महानिर्देशक समेत भइसकेका छन्।