मधेस आन्दोलनको १५ वर्ष पूरा, आज बलिदानी दिवस मनाइँदै

जनकपुरधाम- पहिलो मधेस आन्दोलनको आज १५ वर्ष पूरा भएको छ। स्वायत्त मधेस एक प्रदेश र अधिकार प्राप्तिका लागि आज भन्दा ठीक १५ वर्ष अगाडी मधेसी जनताले आन्दोलनको विगुल फुकेका थिए। जुन आन्दोलन १९ दिनसम्म चलेको थियो।

मधेसमा अधिकारका लागि पटक पटक गरी तीन पटक आन्दोलन भयो। तीन वटै मधेस आन्दोलनमा गरी जम्मा १ सय ३ जनाले शहादत प्राप्त गरे। मधेस आन्दोलनकै बलमा प्रदेशको नामाकरण मधेश प्रदेश भएको छ।

यद्यपि आन्दोलन जति पुराने हुँदै गयो, आन्दोलनको विरासत पनि कमजोर हुँदै गएको आरोप समेत लाग्दै आइरहेको छ। तर मधेस आन्दोलनको सम्झनालाई ताजा राख्नका लागि प्रत्येक वर्ष यो दिनलाई बलिदानी दिवसको रुपमा मनाइदै आएको छ।

सोही अवसर पारेर मधेस सरकारले बलिदानी दिवस मनाउन लागेको छ। मधेस सरकारको आयोजनामा सप्तरीको राजविराजमा बलिदानी दिवसको अवसर पारेर कार्यक्रमको आयोजना गरिएको छ। 

सो कार्यक्रममा ५७ जना शहीदहरुको परिवारलाई नगद सहित सम्मान गर्ने कार्यक्रम रहेको छ। प्रदेश सरकारले बलिदानी दिवसको अवसरमा सार्वजनिक विदा समेत दिएको छ।