जनकपुरधाम– प्रदेश २ को नामाकरण मधेश प्रदेश गरिएको विरोधमा जनकपुरधामका युवाहरुले प्रदेशसभा सदस्यहरुको पुतला दहन गरेका छन्। ८ जिल्लाको प्रदेशलाई मधेश नामाकरण गरिएकोमा आपत्ति जनाउँदै यहाँका युवाले विरोध गरेका हुन्।
जनकपुरधामस्थित जानकी चोकमा युवा अभियन्ता सुशील कर्णको अगुवाईमा युवाहरुले ८ जिल्लाको प्रदेशलाई मधेश प्रदेश नमान्ने चेतावनी दिएका हुन्। पुतला दहन गरिरहँदा युवाहरुले प्रदेश सांसद मुर्दावाद, ८ जिल्लालाई मात्रै मधेश प्रदेश मान्दैनौँ, पहिचानसहितको मिथिला भोजपुरा प्रदेश नामाकरण गर लगायतका नाराहरु लगाएका थिए।
युवा अभियन्ता सुशील कर्णले यो ८ जिल्लाको पहिचान मिथिला भोजपुरा रहेकाले नामाकरण पनि सोही पहिचानको आधारमा हुनुपर्ने माग गरे। ‘यो ८ जिल्ला मात्रै मधेश होइन,’ कर्णले भने, ‘२२ जिल्लासहित मधेश प्रदेश नामाकरण गरे हामीलाई स्वीकार छ, नभए यहाँको पहिचान सहित मिथिला भोजपुरा नामाकरण हुनुपर्छ।’ ८ जिल्लाको प्रदेशलाई मात्रै मधेश प्रदेश नामाकरण गरेर प्रदेशसभा सदस्यहरुले अदूरदर्शिता देखाएको उनले आरोप लगाए। प्रदेशको नामाकरणको सवालमा पुनर्विचार नभए यो संघर्ष निरन्तर जारी रहने उनको भनाइ थियो।