प्रदेशको नाम र राजधानीका लागि भएको मतदानमा ५ सांसद अनुपस्थित

जनकपुरधाम- प्रदेशको नाम र अस्थायी राजधानीका लागि मतदान भइरहँदा ५ जना प्रदेशसभा सदस्यहरु अनुपस्थित देखिएका थिए। प्रदेशको नाम र राजधानी तोक्न सोमबार भएको मतदानमा ९९ जना सांसदहरु मात्रै मतदान प्रक्रियामा सहभागी भएका थिए। जबकी प्रदेश २ मा प्रदेशसभा सदस्यहरुको संख्या १०४ रहेको छ। 

प्रदेशको नाम र राजधानी तोक्नका लागि भएको मतदान सर्लाहीको निर्वाचन क्षेत्र नम्बर ३ (१) बाट निर्वाचित नेकपा एकिकृत समाजवादीका सांसद डिल्लीप्रसाद उप्रेती र सोही पार्टीको सप्तरी निर्वाचन क्षेत्र नम्बर ४ (१) बाट निर्वाचित गोविन्द बहादुर न्यौपाने सोमबार बसेको प्रदेशसभा बैठकमा अनुपस्थित रहेका थिए। त्यस्तै, नेपाली काँग्रेस बाराका सांसद शोभा लामा, नेकपा एमाले धनुषाका अनिता कुमारी यादव तथा जनता समाजवादी पार्टी नेपाल महोत्तरीका सांसद डा. रिना यादव समेत अनुपस्थित रहेको प्रदेशसभा सचिवालयका सचिव रञ्जित यादवले जानकारी दिए। 

सोमबार बसेको प्रदेशसभा बैठकले प्रदेशको नाम मधेश प्रदेश र राजधानी जनकपुरधाम राख्ने प्रस्ताव २ तिहाई बहुमतका साथ पारित गरेको हो।

नामकरणका लागि भएको मतदानमा ९९ सांसद सहभागी भएकोमध्ये ८० जनाले मधेशको पक्षमा मतदान गरेका थिए भने ७८ जनाले राजधानी जनकपुरधामको पक्षमा मतदान गरेका थिए।