हात्तीको आक्रमणबाट सैनिकको मृत्यु

काठमाडौं– चितवन राष्ट्रिय निकुञ्जमा जंगली हात्तीको आक्रमणबाट नेपाली सेनाका एक अमल्दारको मृत्यु भएको छ। निकुञ्ज सुरक्षार्थ खटिएको खड्ग दल गणअन्तर्गतको ध्रुव पोस्टमा कार्यरत अमल्दार गुप्तबहादुर थापाको हात्ती आक्रमणबाट मृत्यु भएको हो। उनलाई शनिबार साँझ हात्तीले आक्रमण गरेको थियो।

साइकलमा गस्तीमा निस्किएका सैनिकमाथि पौने ७ बजेतिर हात्तीले आक्रमण गरेको थियो। घाइते थापाको उपचारका क्रममा राति सवा ११ बजे भरतपुर मेडिकल कलेमा मृत्यु भएको निकुञ्जका सूचना अधिकारी गणेशप्रसाद तिवारीले बताए। आक्रमण गर्ने हात्ती ‘ध्रुवे’ भएको बताइएको छ। ध्रुवे हात्तीको आक्रमणबाट यसअघि १५ जनाको ज्यान गइसकेको छ। २०६६ सालमा चितवन राष्ट्रिय निकुञ्जमा देखा परेको ध्रुवेले भौतिक संरचना पनि नष्ट गरेको छ। 

तिवारीका अनुसािर गस्तीमा गएका अरू सैनिक भने सुरक्षित छन्। थापाको शव भरतपुर मेडिकल कलेजमा राखिएको छ।