विश्वकप २०१८ को फाइनल भिडन्त शुरु: यस्तो छ दुवै टोलीको ‘हेड टु हेड’

काठमाडौं- विश्वकप २०१८ को फाइनल खेलमा आज (आइतबार) पुर्व विश्वकप विजेता फ्रान्स र आफ्नो विश्वकप इतिहास रच्ने दाउमा रहेको क्रोएसियाबीच भिडन्त हुँदैछ। 

यी दुई टोली विश्वकप २०१८ को ट्रफी उचाल्ने दाउमा छन्। क्रोएसियाको यो ऐतिहासिक यात्रामा कप्तान लुका मोड्रिक, इभान राकिटिच, इभान पेरिसिच, मारियो म्यान्जुकिच र गोलरक्षक सुवासिक मुख्य हतियार हुनेछ।

यता, उपाधीको दाबेदार मानिएको फ्रान्सका लागि उपाधि यात्रामा टिनेजर केलियन बाप्पे, एन्टोइन ग्रिजम्यान, पल पोग्वा र ह्युगो लोरिसलार्इ अस्त्र बनाउने रणनीति छ। 

दुवै टोलीको ‘हेड टु हेड’

दुई टोलीबीच हालसम्म पाँच खेलमा भेट भएको छ। सन् १९९८ को विश्वकपको सेमिफाइनलमा फ्रान्सले क्रोएसियालाई २-१ ले हराएको थियो। १९९९ मा भएको मैत्रीपूर्ण खेलमा फ्रान्स ३-० ले विजयी हुँदा २००० मा भएको मैत्रीपूर्णमा पनि फ्रान्सले २-० को जित निकालेको थियो। 

२००४ को युरोकपमा २-२ गोलको बराबरी खेल्दा २०११ मा भएको मैत्रीपूर्ण खेल गोलरहित बराबरीमा सकिएको थियो । त्यसैले यी दुई टिमबीचको फाइनल खेल निकै रोमाञ्चक र प्रतिस्पर्धात्मक हुने अनुमान गर्न सकिन्छ।