एमाले सुर्खेत अध्यक्षमा अमृत बिसी निर्वाचित

 काठमाडौं- नेकपा एमाले सुर्खेतको अध्यक्षमा अमृत बिसी निर्वाचित भएका छन्। एमाले सुर्खेतको नयाँ नेतृत्वका लागि भएको निर्वाचनमा अध्यक्षसहित पदाधिकारीमा बिसीको प्यानल नै विजयी भएको छ। 

अध्यक्षमा बिसीले डण्डीप्रसाद शर्मालाई १ सय १ मतान्तरले  हराएको एमाले निर्वाचन समिति सुर्खेतले जनाएको छ।  

बिसीले ३ सय ६८ र शर्माले २ सय ६७ मत प्राप्त गरेका छन्। यसैगरी उपाध्यक्षमा कुलमणि देवकोटा ३ सय ९४ मतका साथ विजयी भए। उनका प्रतिस्पर्धी ऋषि गीरिले २ सय २६ मत पाए।

सचिवमा कविन्द्र केसी, उपसचिवमा घनश्याम पाण्डे र बलबहादुर नेपाली विजयी भएका छन्। उनीहरू पनि बिसी प्यानलकै नेता हुन्।

पुस २३ गते सुरु भएको जिल्ला अधिवेशनमा सहमति हुन नसकेपछि मंगलबार मतदान भएको थियो।