जापानलाई वैदेशिक रोजगारीको गन्तव्य बनाउँदै सरकार 

काठमाडौ– सरकारले जापानलाई वैदेशिक रोजगारका लागि गन्तब्य बनाउने तयारी गरेको छ। विभिन्न व्यक्ति र कम्पनीहरुबाट कामदार ठगिनु परेका घटनाहरुको अध्ययनपछि सरकारले सुरक्षित तथा व्यवस्थित रुपमा जापान पठाउने तयारी थालेको हो । 

जापानमा रोजगारीको बाटो खुलाउन श्रम तथा रोजगार मन्त्री गोकर्ण विष्टले पहल सुरु गरेका छन्। उनले शुक्रबार मात्रै नेपालका लागि जापानी राजदूत मासामिचि साईगोलेसँग छलफल गरेका थिए । 

छलफल सकारात्मक भएको श्रम मन्त्री विष्टले नेपाल समयसँग बताए । मन्त्री विष्टका अनुसार नेपाली प्रशिक्षार्थी कामदार पठाउनका लागि एउटा संयुक्त संयन्त्र बनाउने प्रस्ताव नेपालले गरेको छ। 

त्यसका लागि गृहकार्य सुरु भएको छ । जापानी राजदूत साईगोले यो प्रस्ताव जापान सरकार समक्ष पु–याउने प्रतिबद्धता प्रकट गरेका छन् ।

‘हाम्रो तर्फबाट जापानमा प्रशिक्षर्थी कामदार पठाउन नेपाल जापानबीच संयुक्त संयन्त्र बनाउने र त्यसले मापदण्ड तोक्ने बिषयमा छलफल भएको छ’ विष्टले भने ।