प्रदेश २ को राजधानी वीरगंज बनाउन माग गर्दै प्रदर्शन

पर्सा - प्रदेश २ को राजधानी वीरगंज कायम गर्न माग गर्दै वीरगंजमा जुलुस निकालिएको छ। प्रदेश सरकार र सदनलाई खबरदारी गर्ने उद्देश्यले विभिन्न स्थानबाट र्‍याली निकालेर प्रदर्शन गरिएको हो। 

प्रदेशको एकमात्र महानगर भएको र देशको अर्थतन्त्रमा महत्वपुर्ण योगदान दिदै आएको वीरगंज हरेक दृष्टकोणमा राजधानीका लागि उपयुक्त रहेको भन्दै जुलुस प्रदर्शन गरिएको छ। 

र्‍यालीमा सहभागीहरूले मुख्यमन्त्री चाहिँदैन, वीरगंजलाई बेच्‍न पाइँदैन भन्दै वीरगंजलाई प्रदेश–२ को राजधानी नबनाएर मधेश आन्दोलन, यसमा सहादत प्राप्त सहीदहरू एवं घाइते मधेशी समुदायको भावनामाथि नेताहरुले कुठाराघात गरेको भन्दै प्रदर्शन गरेको हो। 

वीरगंजलाई प्रदेश २ को राजधानी कायम हुन नदिने षड्यन्त्रमा मुख्यमन्त्री मोहम्मद लालबाबु राउत गद्दी आफै लागेकाले तिनले राजीनामा समेत दिनुपर्ने प्रदर्शनकारीहरुले माग गरेका छन्। बारा, रौतहट, सर्लाही सम्मका प्रतिनिधिको आवाजपनि वीरगंज नै राजधानी हुनुपर्छ भन्ने रहेकाले आन्दोलनका बेला गरेका वाचा भुल्न नहुने बताएका थिए। 

वीरगंजको विर्ता, आदर्शनगर, मुर्लि लगायतको स्थानबाट निकालिएको र्‍यालिले नगरपरिक्रमा गर्दै घण्टाघरमा कोणसभा गरिएको थियो।