नारायणीमा ४० हजार माछाका भुरा छोडियो

काठमाडौं- जलहारी र बोटे सामुदायको आर्थिक विकासमा सहज होस् भन्‍ने उद्देश्यले नारायणी नदीमा ४० हजार माछाका भुरा छाडिएको बताएका छन्। 

रहु र नैनी जातका माछाका ४० हजार भुरा जलाशय मत्स्य प्रबर्द्धन एवं संरक्षण केन्द्र हेटौंडा मकवानपुरले नारायणी नदीमा छाडेको हो।

जलीय जैविक विविधता संरक्षण तथा प्राकृतिक जलाशयमा आश्रित समुदायको आयस्तर अभिवृद्धिका लागि स्थानीय जातको माछा नदीमा छाडिएको कार्यालयका प्रमुख सरोज कुमार यादवले बताए। 

कार्यालयले अघिल्लो वर्ष पनि नारायणीमा ४० हजार भुरा छोडेको र यस पटक स्याङ्‌जास्थित काली नदी र कोशी नदीमा पनि माछाको भुरा छोड्ने योजना रहेको यादवले बताए। यसअघि मकवानपुरको सामारी नदीमा पनी ३४ हजार माछा भुरा छाडेको उनको भनाई छ ।

खोला नालामा फोहोर ढल मिसाउने, बिषादी हाल्ने, करेन्ट लगाउने, पासो थाप्ने लगाएतका कारणबाट जलचर मासिने क्रम बढेकाले यसको संरक्षण गरी नदीमा आश्रित समुदायको जिवनस्थर विकासका लागि आफुहरुले यो कार्यक्रम गरेको यादवको भनाई छ।

आफुहरुको मेचीदेखि महाकालीसम्म कार्यक्षेत्र रहेको र नदी नालाको अध्यान गरी कुन माछा संकटमा छ त्यसको आधारमा माछालाई प्रबर्द्धन गर्न माछा भुरा छोडिँदै आएको उनले बताए।