जनकपुरधाम- लोकतान्त्रिक समाजवादी पार्टी (लोसपा)का एक उम्मेदवार उम्मेदवारी दर्ता गराउनबाट वञ्चित भएका छन्। लोसपाले राष्ट्रिय सभामा उम्मेदवारीका लागि अन्य समूहबाट उम्मेदवारीका लागि प्रदेश निर्वाचन आयोगको कार्यालय पुगेका श्यामसुन्दर सरदारले उम्मेदवारीबाट वञ्चित भएका हुन्।
उनी उम्मेदवारी दर्ता गराउन पुगे पनि आर्थिक लाभ लिने पदमा कार्यरत रहेको र प्रदेश सभाको समानुपातिक तर्फको बन्द सूचीमा उनको नाम रहेकाले उनी उम्मेदवार बन्न नसकेको प्रदेश २ का निर्वाचन अधिकृत पुष्पा झाले जानकारी दिइन्।
सप्तरीको कञ्चनरुप निवासी सरदार प्रदेश २ सरकारले गठन २०७८ फागुन ६ मा गठन गरेको दलित विकास समितिका सदस्य समेत हुन्। यसका साथै उनी समितिबाट आर्थिक लाभ लिइरहेका छन्। राष्ट्रिय सभा निर्वाचन निर्देशिकामा आर्थिक लाभको पदमा रहेका व्यक्तिले उम्मेदवारी दिन नपाउने व्यवस्था छ।
श्यामसुन्दर सरदार उम्मेदवारीबाट वञ्चित भएपछि प्रदेश २मा राष्ट्रियसभाको २ पदका लागि ४ दलबाट ५ जनाको उम्मेदवारी परेको हो। त्यस्तै लोसपाबाट महिला कोटामा रुपा यादवको उम्मेदवारी मात्रै परेको छ।