चिकित्सकहरु उत्रिए हडतालमा : देशभरका अस्पताल बन्द

काठमाडौँ- १४ दिनदेखि जुम्लामा अनशनरत डा गोविन्द केसीको मागप्रति सरकार संवेदनशील नभएको भन्दै चिकित्सकहरुले देशैभरका अस्पतालहरुको आकस्मिकबाहेकका सबै सेवा ठप्प पारेका छन् । 

आवासीय चिकित्सकहरूको संस्था नेशनल रेजिडेण्ड डक्टर्स एसोसिएशनको आवह्वानमा देशभरको स्वास्थ्य सेवा ठप्प पारिएको हो । एशोसियनको आन्दोलनले चिकित्सा विज्ञान राष्ट्रिय प्रतिष्ठान (न्याम्स), त्रिवि चिकित्साशास्त्र अध्ययन संस्थान (आइओएम), विपी कोइराला स्वाथ्य विज्ञान प्रतिष्ठान धरान र सरकारले तोकेका र सरकारको लगानी रहेका अन्य सरकारी शिक्षण अस्पतालमा असर पर्नेछ ।

एसोसिएसनको आवह्वानसंगै जिल्लाका सरकारी अस्पतालमा समेत असर परेको छ । केही निजी अस्पतालले पनि एसोसिएसनको कदममा साथ दिएका छन् ।   

डा केसीको माग पूरा नगरी सरकार मौन बस्नुले आफूहरू स्तब्ध भएको भन्दै आन्दोलनको कार्यक्रम गर्नुपरेको एशोसिएशनले जनाएको छ । एसोसिएशनका अध्यक्ष डा. सुमित पाण्डेले अनसनरत डा. केसीका मागप्रति सरकार संवेदनशील नभएकाले आफूहरु बाध्य भएर आकस्मिक बाहेकका सेवा ठप्प पार्नु परेको बताए । 

दुई दिनअघि प्रधानमन्त्री केपी ओलीले हड्तालमा नउत्रिन चिकित्सकहरुलाई चेतावनी दिएका थिए । उनले अस्पताल बन्द गरेर आन्दोलनमा उत्रिए ठिक नहुने भन्दै डा केसीको विषयलाई धेरै नचाल्न समेत सचेत गारएका थिए ।