करेन्ट लगाएर माछा मार्नेलाई १५ हजार जरिवाना

सुर्खेत– दैलेखमा करेन्ट (विद्युतीय धार) लगाएर माछा मार्ने तीन जना स्थानीयलाई १५ हजार रुपैयाँ जरिवाना तिराइएको छ। जिल्ला प्रशासन कार्यालय दैलेखले करेन्ट लगाएर माछा मार्ने गुराँस गाँउपालिका ४ का ३३ वर्षीय हर्कबहादुर शाही, सोही ठाउँका २६ वर्षीय रमेश पुन र २६ वर्षकै रवीन्द्रबहादुर शाहीलाई जनही ५–५ हजारका दरले १५ हजार रुपैयाँ जरिवाना तिराएको हो। उनीहरुले ‘जलचर संरक्षण ऐन २०१७’ दफा ३ विपरीत काम गरेको भन्दै जरिवाना तिराइएको हो।

उनीहरुलाई पुस १३ गते गुराँस गाँउपालिका –२ को लोहोरे खोलामा करेन्ट लगाएर माछा मार्दै गर्दा प्रहरीले रंगेहात पक्राउ गरेको थियो। करेन्ट लगाएर माछा मार्न प्रयोग गरिएका १२ भोल्ट ब्याट्री, एक–एक थान मेसिन, क्वाएल रड, र माछा मार्ने जालको प्रमाण मान्दै प्रशासनले जनही ५–५ हजारका दरले १५ हजार जरिवाना तिराएको दैलेखका प्रमुख जिल्ला अधिकारी हरि प्याकुरेलले जानकारी दिए।

खोलामा करेन्ट लगाएर माछा मारिरहेको विशेष सूचनाका आधारमा प्रहरी टोली उनीहरु पक्राउ गरेको प्याकुरेलले बताए। जरिवाना तिराएपछि उनीहरुलाई छोडिएको छ।