मृत भेटिएका बोहराको हत्या आरोपमा एक जना पक्राउ

धनगढी- बैतडीमा मृत भेटिएका कटक बोहराको हत्या आरोपमा एक जनालाई प्रहरीले पक्राउ गरेको छ।जिल्लाको सिगास गाउँपालिका-८ का ५५ वर्षीय कटक बोहराको हत्यामा संलग्न रहेको आरोपमा सिगास गाउँपालिका वडा नम्बर ७ का ३० वर्षीय रमेशसिंह ऐरलाई पक्राउ गरेको प्रहरीले जनाएको छ। 

गत मंसिर १३ गते राति कालपोखरी मन्दिरको जात्रा हेर्न गएका बोहरा अर्कोदिन मृत फेला परेका थिए। मृतक बोहराको शरीरमा घाउचोट देखिएको भन्दै आफन्तले हत्याको आशंका गर्दै प्रहरीमा निवेदन दिएका थिए।

निवेदनपछि अनुसन्धान थालेको प्रहरीले घटना भएको भोलिपल्टबाट फरार रहेका ऐरलाई सोमबाट पक्राउ गरेको ईलाका प्रहरी कार्यालय पाटनका प्रहरी निरीक्षक राजेश शाहीले बताए। 

ऐरले मंसिर १३ गते राति बोहरासँग विवाद भएको र सो बेला कुटपीट गरेको स्वीकार गरको प्रहरीले जनाएको छ। प्रहरी निरीक्षक शाहीले घटनाको थप अनुसन्धान भइरहेको जनाएको छ।