भक्तपुरमा १११ जनालाई सुरक्षित स्थानमा सारियो

काठमाडौं-बाढी प्रभावित भक्तपुरका बासिन्दालाई उद्धार गरेर सुरक्षित स्थानमा सारिएको महानगरीय प्रहरी आयुक्तको कार्यालय रानीपोखरीले जनाएको छ । 

प्रहरी वरिष्ठ उपरीक्षक (एसएसपी) पूर्णचन्द्र जोशीका अनुसार हालसम्म एक सय ११ जनालाई उद्धार गरेर सुरक्षित स्थलमा पुर्‍याइएको हो । तीमध्ये अधिकांशलाई आफन्तका घरहरूमा पुर्‍याइएको एसएसपी जोशीले जानकारी दिए । 

भक्तपुरका चाँगुनारायण र मध्यपुर थिमी नगरपालिका सबैभन्दा बढी बाढीको चपेटामा परेका छन् । उद्धार गरिएका सबैजसो दुवै नगरपालिकाका बासिन्दा हुन् । राधेराधे इलाका बढी डुबानमा परेको छ । 

बाढीमा परी चाँगुनारायण-७ मझुवामा एकै परिवारका तीन जनाको मृत्यु भएको थियो । हनुमन्ते र ब्रम्हाणी खोलाको बाढीले ठिमी र बालकोट जोड्ने फलामे पुल बगाएको छ । दुवाकोट, सूर्यविनायक, इवामुरालगायत स्थान डुबानमा परेका छन् । 

चाँगुनारायण-९ मा पहिरो जाँदा भक्तपुर-नगरकोट सडक अवरुद्ध भएको छ । पलाँसेमा रुख ढलेर सडकमा अवरोध सिर्जना भएको थियो  

यस्तै, ललितपुरको भलेडाँडामा रुखको हाँगा भाँचिएर लाग्दा एक पैदल यात्रु घाइते भएका छन् । म्हेपीमा पनि रुख ढलेर सडक अवरुद्ध भएको छ । काठमाडौंको चाबहिलमा रुख ढल्दा चक्रपथ सडक अवरुद्ध भएको थियो ।