यसकारण डुब्यो भक्तपुर (भिडियो)

काठमाडौं- बुधबार रातिदेखिको मुसलधारे वर्षाका कारण बिहीबार बिहानैदेखि भक्तपुर क्षेत्र डुबानमा पर्‍यो । जल तथा मौसम विज्ञान विभागले त्यसलाई शहरी बाढी (अर्बान फ्लड) भएको बताएको छ । 

त्यो भनेको शहरी इलाकामा भवनलगायत संरचना बन्ने र पानीको बहाव थुनिने अनि वर्षाको भेल सीधै बस्तीमा पस्ने समस्या हो । 

बुधबार रातिदेखि बिहीबार बिहानसम्म उपत्यकामा मुसलधारे वर्षा भएको थियो । त्रिभुवन अन्तर्राष्ट्रिय विमानस्थलस्थित मापन केन्द्रमा ९३ दशमलव ६ मिलिमिटर वर्षा रेकर्ड भएको छ । भक्तपुरमा ८७ मिलिमिटर वर्षा मापन भएको छ । 

भिडियो हेर्नुहोस्

यस्तै, ललितपुरका खोकनामा ६८ दशमलव दुई र गोदावरीमा ९५ दशमलव दुई मिलिमिटर वर्षा मापन भएको छ । काठमाडौंका बुढानीलकण्ठमा ५० दशमलव दुई र सुन्दरीजलमा ७८ दशमलव चार मिलिमिटर वर्षा भएको छ । 

'यो छोटो समयमा भएको अत्यधिक वर्षा हो,' विभागका महानिर्देशक ऋषिराम शर्माले नेपाल समयसँग भने, 'त्यसमाथि निकास थुनिँदा डुबानको समस्या देखिएको हो ।'

दुई वर्षअघि पनि भक्तपुरमा यस्तै डुबानको समस्या देखिएको थियो । केही वर्षयता शहरी अव्यवस्थित बस्तीको समस्या भक्तपुर क्षेत्रमा बढी देखिएको छ । त्यससँगै भक्तपुर क्षेत्रमा खोला र नदीको बहाव क्षेत्रको अतिक्रमण अत्यधिक बढेको छ । ती क्षेत्रमा घर थपिने क्रमसँगै पानीको निकास साँघुरियो । खोला थुनिए/साँघुरिए, पानीले सहज निकास पाएन । 

ठाउँ-ठाउँमा पुल निर्माण गर्दा पनि खोला-नदीको बहावलाई दृष्टिगोचर गरिएन । 'दुई वर्षअघिकै घटना दोहोरिएको हो भक्तपुरमा,' महानिर्देशक शर्माले भने ।

विभागले बारम्बार शहरी क्षेत्रको पानी निकासमा रहेको जटिलताबारे चेतावनी पनि नदिएको होइन । तर, पत्ता लगाउनुपर्ने विषय हो, खोलाको बहाव कहाँ-कहाँ अवरुद्ध भएको छ र सहज निकासको व्यवस्था कसरी गर्न सकिन्छ भन्ने । विभागको चेतावनीका बावजुद उपत्यकामा खोला/नदी अतिक्रमण रोकिनु साटो अझ बढ्दो क्रममा छ । दुई वर्ष अघिसम्म वर्षामा ठूलो परिमाणमा पानी बग्ने इलाका अहिले घरै-घरले भरिएका छन् । 

भक्तपुरका एसपी हिमालय श्रेष्ठका अनुसार बुधबार रातिको वर्षाका कारण मनोहरा र हनुमन्ते खोलाको पानी सीधै बस्तीमा पसेको पाइएको छ । पानी निकासको प्राकृति बहाव 'डोल'समेत भरिएको पाइएकाले वर्षा पनि अत्यधिक भएको बुझ्न गर्न सकिने एसपी श्रेष्ठले बताए । 

'खोला साँघुरा हुँदै गए । त्यसैले हनुमन्ते र मनोहरा खोलाले बितण्डा मच्चाए,' रातभर जिल्लाभरिको अवस्थाबारे अपडेट रहेका एसपी श्रेष्ठले भने ।