प्रदेश २ सरकारले आज प्रदेशसभामा अध्यादेश पेस गर्ने

जनकपुरधाम- प्रदेश २ सरकारले प्रदेशसभा बैठकमा अध्यादेश पेस गर्न लागेको छ। 

आइतबार दिउँसो १ बजेका लागि बोलाइएको प्रदेशसभा बैठकमा प्रदेश सरकारले प्रदेश प्राविधिक विश्वविद्यालय अध्यादेश २०७८ पेस गर्ने कार्यसूची रहेको प्रदेशसभाका सचिव रञ्जित कुमार यादवले जानकारी दिए। 

केही साताअघि प्रदेश सरकारले ल्याएको दुई वटा अध्यादेशमध्ये प्रदेश कृषि विश्वविद्यालय अध्यादेश २०७८ प्रदेशसभामा स्वीकृत भएपछि आज अर्को अध्यादेश पेस गर्न लागेको हो। 

प्रदेशसकारको तर्फबाट सामाजिक विकास मन्त्री नबल किशोर साहले सो अध्यादेश पेस गर्नेछन् भने उनले पेस गर्ने अध्यादेशको विरोधमा प्रमुख प्रतिपक्षी दल लोकतान्त्रिक समाजवादी पार्टीका प्रमुख सचेतक परमेश्वर साहले अध्यादेश अस्वीकृत गर्न प्रस्ताव पेस गर्ने कार्यसूची रहेको छ। 

अध्यादेश अस्वीकृत गर्ने प्रस्तावमा छलफल पश्चात् मन्त्री साहले जवाफ दिने र मन्त्रीले अध्यादेश पेस गरेपछि पुनः छलफल हुने कार्यसूची रहेको प्रदेशसभा सचिवालयले जनाएको छ। आजकै बैठकमा यस अध्यादेशलाई स्वीकृत गर्ने कार्यसूची रहेको छ।