वर्षासँगै मुलुकभर बाढी-पहिरोको सकस, आधा दर्जन सडक अवरुद्ध

काठमाडौं- बुधबार रातिदेखि परेको अविरल वर्षाका कारण देशभरको जनजीवन प्रभावित भएको छ । वर्षासँगै आएको बाढीका कारण विभिन्न ठाउँ डुबानमा परेका छन् भने केही स्थान पहिरोको उच्च जोखिममा परेका छन् । 

पछिल्लो २४ घण्टामा पूर्वका केही स्थान, मध्य र पश्चिम तरार्इका जिल्लामा भारी वर्षा भएको जल तथा मौसम विज्ञान विभागले जनाएको छ । काठमाडौंमा पछिल्लो २४ घण्टामा ८८ मिलिमिटर वर्षा भएको विभागले बताएको छ । त्यसैगरी मध्य, पश्चिम र पूर्वका केही स्थानमा भारी वर्षा हुने अनुमान गरिएको छ ।

वर्षाको क्रम तत्काल नरोकिने जानकारी गराउँदै मौसमविद्हरूले सतर्क रहन अपिल गरेका छन् । नदी किनारका बासिन्दालाई सुरक्षित स्थानतर्फ जान र पहिरोको जोखिममा रहेका सर्वसाधारणलाई घरबाहिर बस्न सुझाव दिएका छन् ।  

वर्षासँगै आएको बाढीका कारण सप्तरी, सिरहा, धनुषा, नवलपरासी, बाँके, दाङलगायत जिल्लाका विभिन्न गाउँ डुबानमा परेको स्थानीय बासिन्दाले बताएका छन् । यता काभ्रेको बनेपानजिकै पर्ने पुलबजार डुबानमा परेको छ । काभ्रेको पुण्यमाता खोलामा आएको बाढी बस्तिमा पसेपछि पुलबजार क्षेत्रका घर, पसल र टहरा डुबानमा परेको प्रहरीले जनाएको छ । 

यस्तै, वर्षाका कारण हनुमन्ते खोलामा आएको बाढीले भक्तपुर र मध्यपुर डुबानमा परेका छन् । बाढीका कारण भक्तपुरका जगाती र बाराहीका बस्तीमा पानी पसेको छ भने भूकम्पपीडितको शिविर डुबानमा परेको प्रहरीले जनाएको छ । 

यता मध्यपुरथिमिका राधेराधे र कमेरोटार जग्गा एकीकरण आयोजनाभित्र रहेका बस्ती पूरै डुबानमा परेका छन् । मध्यरातिदेखि सयौँ घर डुबानमा परेपछि यहाँका बासिन्दा घरबाट बाहिर निस्कन नपाएको प्रहरीले बताएको छ । 

आधा दर्जन सडक अवरुद्ध

वर्षासँगै आएको बाढी र पहिरोका कारण करिब आधा दर्जन सडक अवरुद्ध भएका छन् ।  मध्यपहाडी, बीपी, अरनिको, फर्पिङ-हेटौंडा, पोखरा–बागलुङ सडक अवरुद्ध भएका हुन् । 

बाढीले पुलबजार क्षेत्र जलमग्न भएपछि अरनिको राजमार्ग अवरुद्ध भएको छ भने काभ्रेभञ्ज्याङ, मंगलटारलगायत ठाउँमा पहिरो खसेपछि बीपी राजमार्ग ठप्प भएको छ । अवरुद्ध बाटो खुलाउने प्रयास भइरहेको  जिल्ला प्रहरी काभ्रेका प्रमुख एसपी रविराज खड्काले बताए । 

यस्तै, सिन्धुली फिक्कल गाउँपालिका-२ सुनामबेंसीमा पहिरो जाँदा मध्यपहाडी लोकमार्गको सिन्धुलीखण्ड अवरुद्ध भएको छ । सडकमाथिबाट माटो खसिरहँदा राजमार्ग पूर्ण रूपमा अवरुद्ध भएको जिल्ला प्रहरीका एसपी रामेश्वरप्रसाद यादवले जानकारी दिए । पहिरो पन्छाउने प्रयास भइरहेको पनि उनले बताए । 

पहिरोका कारण पोखरा–बागलुङ सडकखण्ड अवरुद्ध भएको छ । पर्वतको मोदी गाउँपालिका-५ बाजुङमा पर्ने ध्याप्ले खोला नजिकै माथिबाट लेदो झरेका कारण सडक अवरुद्ध भएको जिल्ला ट्राफिक प्रहरी कार्यालयका प्रमुख महेन्द्र रानाभाटले जानकारी दिए । 

बुधबार राति झण्डै १० बजेदेखि नै पहिरो खस्न शुरु गरेका कारण पोखराबाट पर्वत हुँदै मुस्ताङ, म्याग्दी र बागलुङ जाने तथा पर्वत हुँदै पोखरा तथा अन्य लामो तथा छोटो दूरीमा जाने सयौं सवारी साधन रातिदेखि नै बीचैमा अलपत्र परेका छन् । यस्तै पहिराेका कारण फर्पिङ-हेटौंडा सडकखण्ड पनि पहरोका कारण बन्द भएको छ ।