चेपाङ समुदायले पनि पायो मन्त्री

हेटौंडा- पहिलो पटक लोपोन्मुख चेपाङ समुदायबाट मन्त्री बनेका छन्। बागमती प्रदेशमा पहिलोपटक चेपाङ समुदायका नागरिक मन्त्री पदमा नियुक्त भएका हुन्। 

शुक्रबार बागमतीका मुख्यमन्त्री राजेन्द्रप्रसाद पाण्डेले प्रदेश सरकारमा सन्तबहादुर चेपाङलाई राज्यमन्त्री बनाएका छन्। 

मकवानपुरको राक्सिराङ गाउँपालिका-७ धिराङका चेपाङ भौतिक पूर्वाधार राज्यमन्त्रीमा नियुक्त भएका हुन्। सन्तबहादुर नेपाली कांग्रेसबाट समानुपातिकमा प्रदेशसभा सदस्यमा चुनिएका थिए। 

चेपाङले आजै पद तथा गोपनीयताको सपथ लिएर कार्यभारसमेत सम्हालेका छन्।

राज्यमन्त्रीमा नियुक्त भएपछि सन्तले आफूले समग्र चेपाङ समुदायका निम्ति काम गर्ने बताएका छन्। ‘ चेपाङहरुको स्वास्थ्य बिमा गरिदिन्छु,’ उनले भने। 

चेपाङ समुदायमा मौलाइरहेको बालविवाह नियन्त्रण गर्न पहल गर्ने उनको भनाइ छ। आफूहरूको समुदायबाट पहिलो पटक सन्त मन्त्री बनेपछि चेपाङ समुदाय उत्साहित भएको उनका दाजु चन्द्रबहादुरले बताए।