जनकपुरधाम- नेपाली कांग्रेसको प्रदेश २ नया नेतृत्वका लागि जारी मतदानमा अहिलेसम्म ७० प्रतिशत मत खसेको छ। निर्वाचन समितिका अरुणकुमार यादवका अनुसार साढे ५ बजेसम्म १४ सय मत खसेको हो।
कांग्रेस प्रदेश २ को नयाँ नेतृत्वकालागि पार्टी सभापति शेरबहादुर देउवा पक्षका कृष्ण प्रसाद यादव र निधि–कोइराला पक्षबाट रामसरोज यादवबीच सभापति पदका लागि प्रतिस्पर्धा भइरहेको छ।
बिहान ८ बजेदेखि सुरु हुने भनिएको मतदान डेढ घण्टा अबेर गरेर सुरु भएपछि मतदान प्रकृया लम्बिएको हो। ३० प्रतिशत मतदाता अझै मतदान गर्न बाँकी रहेको र राति ८ बजेसम्म सम्पूर्ण मतदान सम्पन्न हुने निर्वाचन समितिका यादवले बताए।
उनका अनुसार मतदान सम्पन्न भएपछि दुबै समूहको सहमतिपछि मात्रै मतगणना सुरु गरिने छ। प्रदेश २ कांग्रेसमा १ हजार ९ सय ८० जना मतदाता रहेका छन्।