रामकुमार सदा हत्याको आरोपमा पाँचजना पक्राउ

जनकपुरधाम– सिरहामा छुरा प्रहार गरी हत्या गरेको आरोपमा ५ जना पक्राउ परेका छन्। पक्राउ पर्नेमा सिरहाको गोलबजार नगरपालिका वडा नं २ का २२ वर्षीय भुवन प्रसाद महतो, वडा नं ६ का १९ वर्षीय श्रवण कुमार मण्डल, २० वर्षीय कालु भन्ने रोहन विश्वकर्मा, १८ वर्षीय सौकात खान र १९ वर्षीय धर्मेन्द्र यादव रहेको जिल्ला प्रहरी कार्यालय सिरहाका प्रहरी प्रवक्ता सुवास बुढाथोकीले जानकारी दिए। 

शनिवार राति करिब साढे ८ बजे गोलबजार नगरपालिका वडा नं ६ मा दुई समूहबीच विवाद भएको थियो। सोही विवादमा दीपक साह लगायतको समूहले छुरा प्रहार गरेपछि वडा नं ६ डोहटियाका २६ वर्षीय राम कुमार सदा र रिकेश सदा घाइते भएका थिए। 

घाइतेहरुलाई भूमिजा अस्पताल गोलबजार लगेकोमा थप उपचारको लागि आरके मेडिसिटी अस्पताल धनगढी लगेकोमा उपचारको क्रममा राम कुमार सदाको मृत्यु भएको र रिकेश सदाको उपचार भइरहेको प्रवक्ता बुढाथोकीले जानकारी दिए। 

शनिबार गोलबजार–६ स्थित लक्ष्मी मन्दिर देखि पश्चिम तर्फ जाने सार्वजनिक बाटोमा हो–हल्ला गर्दै आफ्नो घरतर्फ जाँदै गरेको राम प्रसाद सदा लगायतको समूहलाई दीपक साह लगायतको समूहले किन हो–हल्ला गरेको, हल्ला नगरी आफ्नो घर जानु भनेपछि विवाद भई झगडा भएको थियो। 

घटनापछि स्थानीयले आन्दोलन गर्दै राज्यमार्ग अवरुद्ध गरेका थिए। सोही प्रदर्शनको क्रममा प्रहरी तथा स्थानीयहरु घाइते भएका थिए। घटनाका सम्बन्धमा थप अनुसन्धान भइरहेको जिल्ला प्रहरी कार्यालय सिरहाले जनाएको छ।