केन्द्रमा मिलेका देउवा र निधिका प्रदेश २ मा छुट्टाछुट्टै उम्मेदवार

जनकपुरधाम– नेपाली कांग्रेस प्रदेश २ को सभापति पदका लागि कांग्रेस प्रदेश २ संसदीय दलका नेता एवं भौतिक पूर्वाधार विकासमन्त्री रामसरोज यादव र रौतहट जिल्ला सभापति कृष्ण यादवले उम्मेदवारी दर्ता गराएका छन्। 

मतदानस्थल जनकपुरधामस्थित गोपाल धर्मशाला पुगेर रामसरोज र कृष्णले सभापतिमा उम्मेदवारी दर्ता गराएका हुन्। सभापतिमा उम्मेदवारी दिएका रामसरोजलाई नेता विमलेन्द्र निधिको समर्थन छ भने कृष्णलाई सभापति शेरबहादुर देउवाको समर्थ रहेको छ। 

यद्यपि रामसरोजले आफू कुनै गुटबाट नभई कांग्रेसबाट उम्मेदवारी दिएको बताए। आफूलाई सबैको समर्थन रहेको बताउँदै उनले आफ्नो जित सुनिश्चित रहेको दाबी गरे। कांग्रेसभित्र गुट उपगुट समाप्त पारेर कांग्रेसलाई मजबुत बनाउनकै लागि आफूले उम्मेदवारी दर्ता गराएको प्रतिक्रिया दिए। 

उता संस्थापन पक्षबाट कृष्णले प्यानल बनाएर उम्मेदवारी दर्ता गराएका हुन्। उनको प्यानलबाट प्रदेश २को महिला बालबालिका युवा तथा खेलकुदमन्त्री वीरेन्द्र सिंह र उपेन्द्र यादवले उपसभापति पदमा उम्मेदवारी दर्ता गराएका छन्।

सभापतिका उम्मेदवार कृष्णले निर्वचित भए कांग्रेसलाई विगत जस्तै प्रदेश २ मा मजबुत बनाउने लक्ष्य रहेको बताए। उनले कांग्रेसका सबै नेता–कार्यकर्तालाई साथ लिएर अगाडि बढ्ने बताए। 

निर्वाचनबाट प्रदेश सभापति, २ उपसभापति, महामन्त्री, एक महिलासहित तीन सहमहामन्त्री र सदस्यहरू चयन गर्नेछ।