जनकपुरधाम– नेपाली कांग्रेस प्रदेश २ अधिवेशन अन्तर्गत नयाँ नेतृत्वका लागि मनोनयन दर्ता प्रक्रिया सुरु भएको छ।
प्रदेश नम्बर–२ को निर्वाचन समितिले सार्वजनिक गरेको तालिका अनुसार मंगलबार दिउँसो साढे १ बजे मतदाता नामावली प्रकाशन गरिएको छ भने मनोनयनपत्र दर्ताका लागि आजै दिउँसो साढे १ देखि साढे ४ बजेसम्मको समय निर्धारण गरिएको छ।
मनोनयन दर्ताका लागि सभापति पदको उम्मेदवारलाई १५ हजार, उपसभापति, महामन्त्री, सहमहामन्त्रीका लागि १० हजार र सदस्य पदका लागि ५ हजार उम्मेदवारी दर्ता शुल्क राखिएको छ।
त्यस्तै, मनोनयनपत्र माथि पर्ने दाबी विरोधको समय साढे ४ देखि ५ बजेसम्म, दावी विरोध उपर निर्णय दिने समय साढे ५ देखि ६ बजेसम्म र वर्णानुक्रम अनुसार उम्मेदवारहरुको नामावली प्रकाशन गर्ने समय साँझ ७ बजे तोकिएको छ।
दर्ता भएको मनोनयन पत्र फिर्ता लिने समय साँझ ७ देखि ८ बजेसम्मका लागि तोकिएको छ भने अन्तिम नामावली प्रकाशन राति १० बजे गरिने निर्वाचन अधिकृत प्रल्हाद गौतमले जानकारी दिए। मतदान बुधबार बिहान ८ देखि मध्याह्न ४ बजेसम्म हुनेछ।