एमसीसी परियोजना सम्झौता अगाडी बढाउनु सरकारको दायित्व हो : गृहमन्त्री खाँण

जनकपुरधाम- गृहमन्त्री बालकृष्ण खाँणले एमसीसी परियोजनालाई अगाडी बढाउने नेपाल सरकारको दायित्व रहेको बताएका छन्।

यसअघिका सरकारहरुकै पालामा यो परियोजनाका लागि प्रकृयाहरु अगाडी बढाइएको र नेपालको विकासका लागि परियोजनासंग नेपाल सरकारले सम्झौता गरेकाले एमसीसी परियोजनालाई अगाडी बढाउनु सरकारको दायित्व रहेको बताए। 

नेपाली कांग्रेस प्रदेश २को अधिवेशनलाई केन्द्रित गरेर जनकपुरधाम आईपुगेका गृहमन्त्री खाँणले संचारकर्मीहरुसंग कुरा गर्दै एमसीसीको बारेमा जनतामा केही भ्रम रहेको बताए। उनले भने, ‘अमेरिकी सरकारले एमसीसीको माध्यमबाट मुख्यतः गरिबी निवारण र रोजगारीसंग सम्बन्धित परियोजना सञ्चालन गरिरहेको छ, यसको अरु कुनै उद्देश्य छैन।’ 

नेपाल सरकारलाई परियोजनाले विद्युतीकरण र विद्युतीकरणको परियोजना तथा सडक निर्माण परियोजनाका लागि निःशर्त अनुदान दिन लागेको जानकारी गराए। उनले भने, ‘एमसीसीको परियोजना कुनै ऋणमा होइन, यो निःशर्त अनुदान हो, गठबन्धनका दलहरुको सहमतिकै आधारमा यो पारित हुन्छ।’

एक प्रश्नमा गृहमन्त्री खाँणले कुनै पनि प्रस्ताव अगाडी बढाउनुभन्दा पहिले सहमति र सहकार्य आवश्यक रहेकाले सरकार यसको तयारीमा लागेको बताए।