आन्तरिक मामिलामन्त्रीको प्रतिबद्धतापछि प्रदर्शन बन्द

जनकपुर- अपडेट : प्रहरी ऐन संशोधनको माग गर्दै दलित समुदायका प्रतिनिधिले प्रदेश २ को प्रदेशसभा बैठक अघि गरेको प्रदर्शन स्थगित भएको छ । 

आन्तरिक मामिला तथा कानुनमन्त्री ज्ञानेन्द्र यादवले दलित समुदायले उठाएको माग जाय रहेको र त्यसलाई सरकारले सम्बोधन गर्ने प्रतिबद्धता जनाएपछि प्रदर्शन स्थगित भएको छ । प्रदर्शनस्थगित भएसँगै अहिले प्रदेशसभा बैठक शुरु भएको छ । 

दलितसमुदायका अगुवाले प्रदेशसभा घेराउ गर्दै प्रर्दशन गरेपछि दिउँसो तीन बजेका लागि बोलाइएको प्रदेशसभा बैठक एक घण्टा रोकिएको थियो । 

विरोध र्‍यालीमा सहभागीहरुले प्रहरी ऐन संशोधन गर्न तथा जनसंख्याको आधारमा समानुपातिक प्रतिनिधित्व गराउन माग गर्दै प्रदेशसभा घेराउ गरेका थिए । 

उनीहरुले प्रदेशसभा बैठकमा लागि आएका सांसद तथा मन्त्रीहरुलाई प्रवेशद्वार मै रोकेका थिए । आन्तरिक मामिला तथा कानुन मन्त्री ज्ञानेन्द्र यादव, कृषिमन्त्री योगेन्द्र यादव प्रदेशसभाको प्रवेशद्वार मै अड्किएका थिए ।