प्रहरी ऐनको विरोधमा प्रदेशसभा घेराउ

जनकपुर-प्रहरी ऐन संशोधनको माग गर्दै दलित समुदायका प्रतिनिधिले प्रदेश २ को प्रदेशसभा बैठक घेराउ गरेका छन् । 

घेराउनका कारण तीन बजे शुरु हुने भनिएको प्रदेशसभा बैठक अहिलेसम्म सञ्चालन हुन सकेको छैन । 

दलित समुदायका प्रतिनिधिहरुले प्रदेशसभाको प्रवेशद्वारबाट सांसद तथा मन्त्रीहरुलाई रोकेका थिए । 

विरोधर्‍यालीमा सहभागीहरुले प्रहरी ऐन संशोधन गर्न तथा जनसंख्याको आधारमा समानुपातिक प्रतिनिधित्व गराउन माग गर्दै प्रदेशसभा घेराउ गरेका हुन् । 

उनीहरुले प्रदेशसभा बैठकमा लागि आएका सांसद तथा मन्त्रीहरुलाई प्रवेशद्वार मै रोकेका थिए । आन्तरिक मामिला तथा कानुन मन्त्री ज्ञानेन्द्र यादव, कृषिमन्त्री योगेन्द्र यादव प्रदेशसभाको प्रवेशद्वार मै अड्किएका थिए । 

उनीहरुले आफ्ना माग सम्बोधन गर्न मन्त्रीहरुलाई आग्रह गरेपछि आन्तरिक मामिलामन्त्री यादवले दलित समूदायको माग प्रति प्रदेश सरकार सकारात्मक रहेको बताए । 

यसैबीच विरोध कार्यक्रमको नेतृत्व गर्दै गएका राष्ट्रियसभा सदस्य रामप्रित पासवानमाथि प्रहरीले हातपात गरेको आरोप लगाएका छन् ।