जनकपुरधाम- जनकपुरधाम उपमहानगरपालिका अन्तर्गतका सामुदायिक विद्यालयमा कार्यरत बालविकास शिक्षक तथा विद्यालयका कर्मचारीहरुले तोकिएको पारिश्रमिक उपलब्ध गराउन उपमहानगरसँग माग गरेका छन्।
सरकारले निर्धारण गरेको तलब जनकपुरधाम उपमहानगरपालिकाले उपलब्ध गराउन तयार नभएपछि बालविकास शिक्षक तथा विद्यालयका कर्मचारीहरुले आन्दोलन गर्ने निर्णय गरेका हुन्।
संघीय सरकारले गत जेठ महिनामा ल्याएको बजेटमार्फत गत साउन महिनादेखि लागु हुनेगरी बाल विकास शिक्षक र विद्यालय कर्मचारीहरुको तलब वृद्धि गर्ने घोषणा गरेको थियो। सरकारको उक्त निर्णय अनुसार धनुषाकै गणेशमान चारनाथ नगरपालिका, सबैला नगरपालिका, धनुषाधाम नगरपालिका, लक्ष्मीनीयाँ गाउँपालिका लगायत अधिकांश स्थानीय तहहरुले तलब वितरण गरिसकेका छन्।
तर, जनकपुरधाम उपमहानगरपालिकाले भने तोकिएको तलब उपलब्ध गराउन आनाकानी गरेपछि आन्दोलनमा जाने विकल्प नरहेको बाल विकास शिक्षक संघर्ष समितिकी जिल्ला सह-संयोजक संजु यादवले बताइन्।
बाल विकासका शिक्षकहरू खानसम्म नपुग्ने तलब मासिक ६ हजार रुपैयाँमा चित्त बुझाउनु पर्ने अवस्थाको अन्त्य हुनुपर्ने र सरकारी तहबाट भएको यो विभेदलाई यथाशीघ्र सच्याउनु पर्ने आफूहरुको माग रहेको उनले बताइन्।
जनकपुरधाम उपमहानगरपालिका अन्तर्गतका सामुदायिक विद्यालयमा कार्यरत बालविकास शिक्षक तथा विद्यालय कर्मचारीहरुको संयूक्त संघर्ष समितिका सह-संयोजक यादवको अध्यक्षतामा बसेको बैठकमा जनकपुरधाम उपमहानगरपालिकामा बुझाइएको ज्ञापनपत्र अनुसार पुस ६ गतेसम्म बालविकास शिक्षक तथा विद्यालय कर्मचारीको तलब भुक्तानी नभए ७ गतेदेखि पेनडाउन गरी बिहान १० बजेदेखि उपमहानगरको कार्यालय अगाडि धर्ना दिने चेतावनी समेत दिइएको छ।
जनकपुरधाम उपमहानगरपालिका मातहतका बालविकास शिक्षक र विद्यालय कर्मचारीहरुको तलव निकासा सम्बन्धी सम्बोधन गराउन शिक्षक संघसंगठनहरुले सकारात्मक भूमिका निर्वाह नगरे आगामी दिनमा आफूहरुले पनि असहयोग गर्ने सह-संयोजक यादवले बताइन्।
यादवले लेखापालको मासिक तलव १८ हजार ५०० र बाल विकास शिक्षक तथा कार्यालय सहयोगीको तलव १५ हजार हुनुपर्ने माग समेत गरिन्।
जनकपुरधाम उपमहानगरपालिकाभित्रका ४९ वटा सामुदायिक विद्यालयमा करिब दुई सयको हाराहारीमा बालविकासका शिक्षकहरू कार्यरत छन्।