कांग्रेसका खुल्ला केन्द्रीय सदस्यको मतगणना १० बजेबाट

काठमाडौं- नेपाली कांग्रेसका ३५ जना खुल्ला केन्द्रीय सदस्यको मतगणना शनिबार बिहान १० बजेदेखि थालिने भएको छ। 

१४औं महाधिवेशनअन्तर्गत सभापतिदेखि सहमहामन्त्रीसम्मको मतगणना सकिएपछि अब केन्द्रीय सदस्यको मतगणना थालिने भएको हो।

कांग्रेसको निर्वाचन समिति संयोजक गोपालकृष्ण घिमिरेले शनिबार बिहान १० बजेदेखि खुल्लातर्फका ३५ केन्द्रीय सदस्यको मत गन्न थालिने जानकारी दिएका छन्। 

समितिले मतगणनाका लागि उम्मेदवार वा एकजना प्रतिनिधि मगतणनास्थल सानेपामा पठाइदिन पनि आग्रह गरेको छ।

यसअघि प्रदेश २ को महिला केन्द्रीय सदस्यमा चित्रलेखा यादव विजयी भएकी छन्।

शुक्रबार भएको मतगणनामा २७३१ मत ल्याएर देउवा समूहकी यादव निर्वाचित भएकी हुन्। यादवले शेखर कोइराला समूहकी गीता चौधरीलाई ८४६ मतान्तरले पराजित गरिन्।

चौधरीले १८८५ मत ल्याइन्। यसअघि नै प्रदेश २ को भूगोलतर्फ पुरूषमा देउवा पक्षका आनन्द ढुंगाना र रमेश रिजाल निर्विरोध निर्वाचित भएका थिए।