सरकार राज्य आतंकमा उत्रियो : सिटौला

काठमाडौं- नेपाली कांग्रेसका नेता कृष्णप्रसाद सिटौलाले केपी ओली नेतृत्वको सरकार आफै राज्यआतंकमा उत्रिएको बताएका छन् ।

विभिन्न सञ्चारमाध्यमका सम्पादकसँगको मंगलबार भएको अनौपचारिक छलफलमा सिटौलाले भने ‘कानुन विपरित कार्य गर्न सरकार आफै लाग्नु भनेको स्टेट टेरोरिज्म हो । पिसफुल मुभमेण्टलाई रोक लगाउनु यसको ज्वलन्त उदाहारण हो ।’

वर्तमान नेपालको इतिहासमै सबैभन्दा बढी शक्तिशाली लोकतान्त्रिक सरकार भएकोले सबैभन्दा कम बल प्रयोग गर्नु पर्नेमा जोड दिए । 

‘यो सरकार लोकतान्त्रिक हो भने जति शक्तिशाली छ, त्यति नै कम बल प्रयोग गर्नुपर्छ’ सिटौलाले भने ‘गृहमन्त्रीले निर्माण व्यवसायीलाई थुन्छु भन्दै हिँड्नु र विश्वविद्यालयका उपकुलपतिलाई थुन्नुलाई लोकतान्त्रिक कदम र विधिको शासन मानिदैन ।’

उपकुलपति जो भएपनि उसलाई एयरपोर्टबाट नियन्त्रणमा लिनुलाई सभ्य समाजले पचाउन नसक्ने भन्दै सिटौलाले न्यायलयलाई समेत कमजोर बनाउने भूमिकामा सरकार लगेको आरोप लगाए । उनले भने ‘अख्तियारका प्रमुख आयुक्त होस वा प्रधानन्यायाधीश उनीहरुको बिरुद्ध महाभियोग प्रस्ताव ल्याउनाले त्यसको असर अहिले आउन थालेको बताए ।

‘स्वतन्त्र नेपाल, दिगो शान्ति, लोकतन्त्र र समृद्धिसहितको आर्थिक उन्नति र प्रगतिको बिषयमा कांग्रेसले सम्झौता गर्दैन’ सिटौलाले भने ।

पार्टी भित्रको आमुल परिवर्तन आफूहरुको चाहना भएको जनाउँदै सिटौलाले पार्टीको विगतको कमजोरीको आडमा अब फेरि त्यस्तो गल्ति दोहोर्‍याउन नचाहेको बताए । उनले भने ‘कांग्रेस विगतको गल्ति सच्याउँदै इतिहासको गौरवमय र राम्रो कार्यको अनुशरण गरेर अघि बढ्छ ।’

उनले संसदमा कांग्रेसको भूमिका प्रमुख प्रतिपक्षीको रुपमा नभएको भन्ने गुनासो सम्बोधन गर्न सभापति शेरबहादुर देउवासँग कुराकानी गर्ने बताए ।