विमला वलीलाई उनकै चाहनामा मुख्यमन्त्री निवासमा ल्याइएको हो : एमाले

बुटवल– नेकपा (एमाले) लुम्बिनी प्रदेशका प्रमुख सचेतक भूमिश्वर ढकालले सांसद विमला वलीलाई उनकै चाहनामा मुख्यमन्त्री निवासमा ल्याइएको दाबी गरेका छन्। 

मुख्यमन्त्री शंकर पोखरेलको निवासमा आफूलाई बन्धक बनाइएको भन्ने वलीको आरोप गलत भएको भन्दै एमाले संसदीय दलले आज बिहीबार  साँझ पत्रकार सम्मेलन गरेको थियो। पत्रकार सम्मेलनमा एमालेका प्रमुख सचेतक ढकालले प्रदेश सांसद वलीकै आग्रहमा मुख्यमन्त्रीसँग भेटघाटका लागि मुख्यमन्त्री निवासमा ल्याएको बताए। 

'विमलाजी एमाले भएको आज पनि हाम्रो दावी छ, उहाँ माओवादीमा गएको चर्चा चलेपछि स्पष्टीकरण सोधिएको थियो। म पत्र बोकेर विमलाजीको घरमा गएको हुँ,' प्रमुख सचेतक ढकालले भने, 'अध्यक्ष केपी ओलीको पत्र पढेपछि उहाँ आफैं मुख्यमन्त्रीसँग भेट्न इच्छा गरेकाले निवासमा सँगै आएको हो।' 

वलीले मुख्यमन्त्री निवासमा आफैं बस्न इच्छा गरेको समेत ढकालको दावी छ। उनले दाङकै सांसद सरस्वती गौतम पनि वलीसँगै रहेको बताए। उनले उपचारका सन्दर्भमा कुनै पनि कुरा नभएको बताए। यसअघि एमालेले भने सांसद वली एमालेको सम्पर्कमा रहेको र उपचारका लागि नेपालगञ्जमा रहेको बताएको थियो। तर, आजको पत्रकार सम्मेलनमा भने प्रमुख सचेतक ढकालले बिरामीको कुनै पनि कुरा नभएको दाबी गरे।

आजै दिउँसो सांसद वलीले नेकपा माओवादी संसदीय दलको कार्यालयमा पत्रकार सम्मेलन गरी तुलसीपुरबाट नेपालगञ्ज लैजाने भन्दै एमालेका प्रमुख सचेतक भूमिश्वर ढकालले मुख्यमन्त्री निवासमा ल्याएर बन्धक बनाएको बताएकी थिइन्।