मतदान अन्तिम चरणमा, मुचुल्का उठाउन थालियो

काठमाडौं- नेपाली कांग्रेसको नयाँ नेतृत्व, पदाधिकारी र केन्द्रीय सदस्यका लागि भइरहेको मतदान अन्तिम चरणमा पुगेको छ।

मतदानका लागि अहिले राति साढे ११ बजेसम्मको समय तोकिएकोमा ११ बजेम्ममा ४५ सय मत खसेको छ।

मतदान सकिन लागेसँगै मुचुल्का उठाउन थालिएको छ। सभापतिको गणना आजै राति १ बजेदेखि गर्ने तयारी छ।

सोमबार बिहान ८ बजेदेखि मतदान सुरु भनिए पनि निर्वाचन समितिको कमजोर तयारीका कारण साढे ११ बजेदेखि मात्र मतदान सुरु भएको थियो। यसअघि राती १० बजेसम्मका लागि मतदान गर्न पाउने भनिएपनि समय थप गरेर साढे ११ बजेसम्म मतदान गर्न पाइने व्यवस्था गरिएको समितिले जनाएको छ।
कांग्रेस सभापतिसहित १३४ पदमा नयाँ नेतृत्व चयन हुनका लागि ४९१ उम्मेदवार चुनावी मैदानमा छन्। काठमाडौंको भृकुटीमण्डपमा दुई वटा र राष्ट्रियसभा गृहमा एउटा गरी जम्मा तीन ठाउँमा मतदाताहरुले मतदान गरिरहेका छन्।
मतदान सकिएलगत्तै सभापतिको मतगणना सुरु गर्ने तयारी गरिएको छ। राती १ बजेदेखि सभापतिका लागि खसेको मत गणना सुरु गर्ने तयारी भइरहेको निर्वाचन समितिले जानकारी दिएको छ।
निर्वाचन समितिले प्रकाशन गरेको अन्तिम नामावली अनुसार सभापति पदका लागि पाँच जना, उपसभापति ९दुई० पदका लागि सात जना, दुई जना महामन्त्रीका लागि ६ र आठ जना सहमहामन्त्रीका लागि १९ जना प्रतिस्पर्धामा छन्।
सभापतिमा शेरबहादुर देउवा, डा शेखर कोइराला, प्रकाशमान सिंह, विमलेन्द्र निधि र कल्याणकुमार गुरुङ प्रतिस्पर्धामा छन्। पहिलो चरणमा सबै पदको मतदान प्रक्रिया सम्पन्‍न भए पश्चात् सभापति पदको मतगणना हुनेछ।
पहिलो चरणमा सभापतिका कुनै पनि उम्मेदवारले ५१ प्रतिशत मत ल्याउन नसकेमा सभापतिका लागि दोस्रो चरणमा निर्वाचन हुनेछ। अन्य पदाधिकारी र केन्द्रीय सदस्यहरुका लागि भने बहुमत ल्याउने विजयी हुने प्रावधान छ।