संसदमा गगन कड्‍किए, 'ओली र ज्ञानेन्द्र उस्तै' 

काठमाडौं- नेपाली कांग्रेसका नेता तथा सांसद गगन थापाले प्रधानमन्त्री केपी शर्मा ओलीलार्इ पूर्व राजा ज्ञानेन्द्रसँग तुलना गरेको छन्। अनसनमा बसेका डा गोविन्द केसीको जीवन रक्षाका निम्ति संसदमा प्रस्तुत जरुरी सार्वजनिक महत्वको प्रस्तावमाथिको छलफलमा सहभागी हुँदै उनले यस्तो तुलना गरेका हुन्।
 
उनले भने, 'अहिलेका प्रधानमन्त्री ओली र पहिलेका राजा ज्ञानेन्द्र शाह उस्तै लाग्यो।' सोमबार बिहान चिकित्सकहरुको प्रतिनिधि मण्डल प्रधानमन्त्रीलाई भेट्न जाँदा ओलीले दुई तिहाईको दम्भमा एकजनाको दबाबमा नपर्ने भन्दै अधिनायकवादी शैली देखाएको बताए।
 
थापाले भने, ‘थापाले पूर्व राजाको ज्ञानेन्द्र शाहले देखाएको दम्भ प्रधानमन्त्रीले दोहर्‍याउन नहुने भन्दै भने,  '२०५९ सालमा महाराज ज्ञानेन्द्रले शासन लिइ बक्सियो । रत्नपार्कमा केहि मानिसहरु संसद पुन स्थापनाको माग राखेर सडकमा बसेका रहेछन्। महाराजको शुभचिन्तकले गएर महाराजलाई भनेछन्, रत्नपार्कमा नेपालका केहि मानिसहरु कराई रहेका छन् ।  के भनिरहेका छन् ? महाराजले सोधि बक्सेछ। उनिहरुले भनेछन् - महाराजले गरेको कामले देशको भलो हुदैन । महाराजले भनि बक्सेछ- पृथ्वी नारायण शाहको बंशज  म ज्ञानेन्द्र शाहलाई सिकाउने । सिकाउने मानिसहरु को हुन् ? महाराजको प्रश्नमा उनिहरुले भनेछन् - गिरिजाप्रसाद कोइराला, माधव कुमार नेपाल, भरत विमल यादव , नारायण काजी श्रेष्ठ लगायतका केहि मानिसहरु ४-५ सय मानिस लिएर बसेका छन् । महाराजले भनेछन् - ४-५ सय मानिसको झुण्डले महाराजलाई सिकाउने ?'

बैठकमा थापले भने,  'गोविन्द केसीको जीवन रक्षाको बिषयलाई लिएर केन्द्रित हुन चाहन्छु । यहि बिषयलाई लिएर चिकित्सक संघका साथिहरु सम्मानीय प्रधानमन्त्रीलाई भेट्न गएका रहेछन्।  प्रधानमन्त्रीले भन्नु भएछ एउटा व्यक्तिले भनेर डराउने मान्छे म होइन। स्वास्थ्य क्षेत्रमा के गर्दा हुन्छ कसैले मलाई सिकाउनु पर्दैन।'  

थापाले प्रधानमन्त्रीलाई भने, 'आज समय र पात्र बदलिएको छ। कर्णालीबाट चिकित्सक अनशन बसेका छन्।  चिकित्सक प्रधानमन्त्रीलाई भन्न गएछन् र भनेछन् यसो गर्यो भने भलो हुँदैन। प्रधानमन्त्रीले भन्नुभएछ, दुई तिहाई संख्या र समर्थन भएको प्रधानमन्त्रीलाई देशको भलो के गर्दा हुन्छ भनेर चिकित्सकले सिकाउने? के गर्दा हुन्छ भनेर उनको समर्थनमा को छ? सोध्दै गर्दा भनेछन्,  केही थान कांग्रेसहरु संसदमा हल्ला गर्दैछन् र केही थान मानिस माइतिघर मण्डलामा हल्ला गर्दैछन्। 

अनि प्रधानमन्त्रीले भन्नुभएछ, केहि थान मानिसको भरमा दुईतिहाई भएको प्रधानमन्त्रीलाई सिकाउने? मलाई बडो दुःख लागेको छ सभामुखज्यु, मलाई चिन्ता पनि लागेको छ। महाराज झुकिबक्स्यो संख्या हेरेर टाउको गनेर।'

थापाले सत्यको पक्षमा एकजना भए पनि हुने बताए। उनले भने,  'सत्यको पक्षमा उभिदै गर्दा फगत एकजना भएपनि पुग्छ। आज गोविन्द केसी सत्यको पक्षमा उभिनुभएको छ।   गोविन्द केसीका पक्षमा टाउको कति छन् नहेर्नुहोस्। सदनको टाउको पनि नग्नुहोस्। चिकित्सा शिक्षा विधेयकमा सहयोग गर्न हामी प्रतिपक्ष पनि तयार छौं। गोविन्द केसीको स्वस्थ्य स्थिति बिग्रीएको छ।' 

उनले गोविन्द केसीमा कुनै किसिमको लोभ नभएको भन्दै उनमा  चिकित्सा शिक्षाको सुधारको नशा मात्रै भएको बताए।