जितपछि बलायरले भने- लोकतन्त्र बलियो बनाउन भएको प्रतिस्पर्धालाई गुटको नाम दिनु हुँदैन

काठमाडौं- नेपाली कांग्रेसको सुदूरपश्‍चिम सभापतिमा निर्वाचित भएका पूर्वमन्त्री वीरबहादुर बलायरले कांग्रेसमा लोकतान्त्रिक अभ्यासका लागि भएको प्रतिस्पर्धालाई गुट-उपगुटको नाम दिन नहुने बताएका छन्। 

प्रदेश निर्वाचन अन्तर्गत शनिबार भएको मतदानको अन्तिम मतपरिणाम सार्वजनिक भएपछि विजयी भएका बलायरले कांग्रेसमा गुट-उपगुटहरु अब नरहने बताएका हुन्। 

उनले भने, 'कांग्रेसले लोकतान्त्रिक अभ्यासका लागि आन्तरिक प्रतिस्पर्धा गरेको हो। कम्युनिस्टजस्तो टीका लगाएर एउटैलाई देवत्करण गर्ने परम्परालाई कांग्रेसले अघि बढाउँदैन। आन्तरिक प्रतिस्पर्धालाई स्वागत गर्दै लोकतान्त्रिक प्रणालीलाई बलियो बनाउने अभियानमा हामी छौं। त्यस प्रतिस्पर्धालाई गुटको नाम दिनु हुँदैन।'

उनले व्यक्तिगत विमतीका कारण कांग्रेसलाई समस्यामा पार्न खोज्‍ने व्यक्ति कांग्रेस हुन नसक्ने पनि उनले बताएका छन्। उनले थपे,'व्यक्तिगत विमति र लाभ-हानीलाई केन्द्रमा राखेर पार्टीलाई धोका दिने व्यक्ति कांग्रेस हुन सक्दैन। त्यो कांग्रेसको चरित्र पनि होइन।'

उनले अब सम्पूर्ण कांग्रेस कम्युनिस्ट चरित्रविरुद्ध एकतृत हुने र आगामी निर्वाचनमा मुलुकको ठूलो दल हुनेसमेत दाबी गरेका छन्। उनले भने, 'अब कांग्रेसको हरेक कार्यकर्ताले आगामी निर्वाचनलाई केन्द्रमा राखेर तयारी गर्नुपर्दछ। जनताले पनि मुलुकको विकास, लोकतन्त्रको सुदृढिकरण र संविधानको रक्षा गर्ने पार्टी कांग्रेस नै हो भन्‍ने बुझ्‍नुपर्दछ।'