हुम्लाको लिमीमा खाद्यान्न ढुवानीमा फेरि अवरोध

काठमाडौं– हुम्लाको नाम्खा गाउँपालिका वडा नम्बर ६ लिमीमा खाद्यान्न ढुवानीमा फेरि अवरोध आएको छ।

लिमीका स्थानीय खाद्यान्न माग गर्दै हुम्ला सदरमुकाम सिमीकोट पुगेपछि नाम्खा गाउँपालिका वडा नम्बर ६ का अध्यक्ष पाल्जोर तामाङ काठमाडौं आएका थिए। उनले गृह मन्त्रालय लगायत निकायसँग खाद्यान्न ढुवानीका लागि पहल गरिदिन आग्रह गरेपछि नेपाली सेनाको हेलिकप्टरबाट सुरु गर्न पहल गरिने भएको थियो। तर, ढुवानी नसकिँदै बिहीबारदेखि फेरि अवरोध आएको हो।

नाम्खा गाउँपालिकाका अध्यक्ष विष्णुबहादुर तामाङले आइतबार र बुधबार दुई दिन ढुवानी गरिए पनि फेरि ढुवानीमा अवरोध आएको जानकारी दिए। चीनसँग सीमा जोडिएको हिल्सा नाकामा रोकिएको खाद्यान्न ढुवानी गत आइतबारबाट सुरु गरिएकोमा बिहीबारदेखि फेरि अवरोध आएको गाउँपालिका अध्यक्ष तामाङले बताए।

‘हिल्सा नाकामा चीन सरकारले राहत स्वरुप खाद्यान्न यसअघि नै पुर्याइदिएको थियो,’ अध्यक्ष तामाङले भने, ‘त्यसमध्ये हामीले वडा नम्बर ६ लाई प्राथमिकतामा राखेर ४६० क्विन्टलजति लिमीलाई छुट्याएका थियौं। यसअघि रोकिएको उक्त खाद्यान्न ढुवानी आइतबार र बुधबारमात्रै भयो। फेरि आजदेखि हिमपात सुरु भएका कारण रोकिएको छ। हेलिकप्टर तयारी अवस्थामा नै छ।’

उनका अनुसार हेलिकप्टरले एक ट्रिपमा १५ क्विन्टल खाद्यान्न ढुवानी गरिरहेको छ। ‘एकदमै हाइ अल्टिट्युड भएका कारण सेनाको हेलिकप्टरले पनि एक पटकमा १५ क्विन्टल भन्दा बढी बोक्न नसक्ने रहेछ,’ उनले भने, ‘एकदमै खोंचमा भएको र हेलिप्याडको राम्रो व्यवस्था नभएका कारण पनि फुल लोड लिन नसकिने रहेछ।’

यसअघि चीन सरकारले राहतस्वरुप दिएको उक्त खाद्यान्न ढुवानी हिमपातकै कारण अवरोध आएको थियो। हिमपात हुँदा बाटो नभएका कारण स्थानीयले हिल्साबाट खाद्यान्न्न ढुवानी गर्न पाएका थिएनन्। खाद्यान्नको चरम समस्या भएपछि लिमीका स्थानीय खाद्यान्न माग गर्दै हुम्ला सदरमुकाम सिमीकोट आएका थिए। अध्यक्ष तामाङका अनुसार हिल्साबाट लिमीमा तत्काल ४५० क्विन्टल खाद्यान्न पुर्याउनुपर्ने छ।

यता, नेपाल खाद्य व्यवस्था तथा व्यापार कम्पनीले जिल्ला प्रशासन कार्यालय हुम्लाको समन्वयमा लिमीमा खाद्यान्न ढुवानी भइरहेको प्रतिक्रिया दिएको छ। कम्पनीका सूचना अधिकारी शर्मिला न्यौपाने सुवेदीले तत्काल लिमीमा जिल्ला प्रशासन कार्यालयको समन्वयमा खाद्यान्न ढुवानी भइरहेको बताइन्।

कम्पनीका अनुसार यस वर्ष हुम्लामा २१ हजार ५ सय क्विन्टल चामल ढुवानी गर्ने कार्यक्रम रहेको थियो। ‘हुम्लामा ढुवानीका लागि स्थलगतमार्फत १७ वटा सेक्टर छ,’ उनले भनिन्, ‘इमर्जेन्सीको लागि हवाईमार्फत पनि अप्सन हो। लिमी क्षेत्रका लागि चाहिँ सदरमुकामस्थित सिडिओ कार्यालयबाट पहल भइराखेको छ।’

यसअघि गत साउनदेखि नै  हुम्लामा खाद्यान्न (चामल) ढुवानी गर्ने कार्यक्रम रहे पनि खाद्य व्यवस्था तथा व्यापार कम्पनीले ढुवानीमा ढिलाइ गर्दा हुम्ला जिल्लाभर नै खाद्यान्न अभाव भएको थियो।