आईएस प्रमुख बगदादीका छोरा मारिए

लन्डन- अन्तर्राष्ट्रिय आतंकवादी संगठन इस्लामिक स्टेट (आईएस)का प्रमुख अबु बकर अल-बगदादीका एक छोरा सुरक्षा कारवाहीमा मारिएका छन् । आईएसले पनि त्यसको पुष्टी गरेको छ । 

बगदादीका छोराको नाम हुदहैफा अल-बद्री थियो । आईएसविरुद्ध सिरिया र रुसको संयुक्त सैन्य कारवाहीमा उनी मारिएका हुन् । आईएसका अनुसार सिरियाको होम्स प्रान्तमा उनी मारिएका हुन् । आतंकवादी संगठनले हातमा राइफल लिएको अल-बद्रीको तस्बिर पनि सार्वजनिक गरेको छ । 

आईएस प्रमुख बगदादी टाउको मूल्य अढाइ करोड अमेरिकी डलर तोकिएको छ । उनी पनि धेरै पटक घाइते भएको र मारिएको अपुष्ट समाचार सार्वजनिक हुने गरेको छ । मारिएका उनका छोराबारे सुरक्षा एजेन्सीहरूलाई कमै जानकारी छ । 

'जिहाद' विषयका जानकार तथा इराक सरकारका सल्लाहकार हिसम अल-हसिमीका अनुसार अल-बद्री इराकी शहर समारामा सन् २००० मा जन्मेका थिए । बगदादी पनि सन् १९७१ मा इराकको राजधानी शहर बगदादमा जन्मेका हुन् । 

सन् २००३ सम्म बगदादी बगदादकै एक मस्जिदमा मौलवी थिए । सन् २०१४ मा एकाएक उनी आईएस प्रमुखका रूपमा देखा परेका हुन् । 

बगदादीका वरिष्ठ कमान्डरहरू पनि धमाधम पक्राउ पर्दै आएका छन् । हालसम्म पाँच जना पक्राउ परिसकेको जानकारी अल-हसिमीले नै सार्वजनिक गरेका थिए । 

विस्तारै उक्त आतंकवादी संगठन कमजोर बन्दै गएको दाबी पश्चिमा मुलुकहरूको छ । अब सिरियाको सानो इलाकामा मात्र आईएसको पकड रहेको उनीहरूको भनाइ छ । इराक सरकारले डिसेम्बर २०१७ मै आईएसविरुद्धको लडाईंमा विजय हासिल भएको दाबी गरिसकेको छ । र, सिरिया सीमावर्ती इलाकामा मात्र सैन्य कारवाहीलाई सीमित बनाएको छ ।