एमालेको झण्डा अब बाँदरले उठाउनेछ : माधव नेपाल

सुर्खेत- नेकपा एकीकृत समाजवादीका अध्यक्ष माधवकुमार नेपालले एमालेको झण्डा अब बाँधरले उठाउने भन्दै कटाक्ष गरेका छन्। ‘पार्टीको झण्डा उठाउन मान्छे नै नपाएपछि अहिले जनावरको हातमा पुगेको छ,’ सुर्खेतमा सञ्‍चारकर्मीहरुसँग नेपालले भने, ‘गैँडाले पार लगाउन सकेन भने अब बाँदरले एमालेको झण्डा उठाउनेछ।’

एमालेले दसौं महाधिवेशनमा पार्टीको झण्डा गैँडाले उचालेको छ। यही सन्दर्भमा कटाक्ष गर्दै उनले एमालेमा पार्टीको झण्डा बोक्ने मान्छे समेत नहुने दाबी गरेका हुन्।

एमाले कम्युनिष्ट पार्टी नभएको आरोप लगाउँदै उनले एमालेमा रहेका सम्पूर्ण कम्युनिष्ट नेता कार्यकर्ताहरु समाजवादीमा लामबद्ध भइसकेको दाबी गरे। 

‘एमाले त कम्युनिष्ट पार्टी नै रहेन,’ उनले भने, ‘अहिले देशभक्त कम्युनिष्टहरु समाजवादी लामबद्ध हुने लहर चलेको छ।’ समाजवादी एमालेबाट चोइटिएको कम्युनिष्ट आन्दोलनलाई जोगाउन विद्रोह गरेको उनको तर्क थियो।

समाजवादीले शुक्रबार आयोजना गर्न लागेको प्रदेशस्तरीय कार्यकर्ता भेलालाई सम्बोधन गर्न सुर्खेत आइपुगेका हुन्। 

वीरेन्द्रनगरको कवर्डहलमा हुने कार्यक्रमलाई नेपालसहित समाजवादीका महासचिव वेदुराम भुषाल, उप–महासचिव प्रकाश ज्वालालगायतका नेताहरुले सम्बोधन गर्नेछन्।