ब्राजिल र बेल्जियमको बहुप्रतिक्षित भिडन्त आज

काठमाडाैं- रुसमा जारी फिफा विश्वकप फुटबल प्रतियोगिता अन्तर्गत शुक्रबार हुने दोस्रो क्वाटर फाइनल खेलमा ब्राजिल र बेल्जियमबीच भिडन्त हुँदैछ । 

रुसको काजान एरिनामा रङ्गशालामा राती पौने १२ बजे हुने यी दुई देशबीचको खेल निकै रोचक हुने अनुमान गरिएको छ । उपाधि दाबेदार मानिएको ब्राजिलका लागि जारी प्रतियोगितामा नै कठिन प्रतिद्वन्द्वीका रूपमा बेल्जियमलाई लिएको छ । दुवै टिममा विश्व चर्चित स्टारहरू रहेका कारण खेल बहुप्रतीक्षित मानिएको हो ।

आजको खेललाई स्टारहरुको जमघटका रुपमा समेत हेरिएको छ । ब्रजिलसँग नेइमारसँगै गाव्रियल जेसस, फिलिप काउटिन्हो, पाउलिन्हो, विलियन, मार्सेलो, थियागो शिल्भा लगायका खेलाडीले भरिएको शशक्त टिम छ भने हाजार्डका अलावा रोमेलु लुकाकु, केभिन डि ब्रुयेन, भिन्सेन्ट कोम्पानी, ड्राइज मार्टिन, थोमस भर्मालिज खेलाडी रहेका छन् । यो बेल्जियनको गोल्डेन जेनेरेशन हो । 

सन् १९८६ मा चौथो भएको बेल्जियम त्यसपछि क्वार्टरफाइनलबाट माथि जान सकेको छैन् । त्यसअघि बेल्जियमले समूह चरण पार गर्न सकेको थिएन । ब्राजिलमा भएको अघिल्लो संस्करणमा बेल्जियम क्वार्टरफाइनलमा पराजित भएको थियो ।

यसपटक बेल्जियम प्रिक्वार्टरफाइनलमा जापानसँग बढी नै आत्मविश्वासी देखिएको थियो । बेल्जियमले २ गोल खाए पनि तीन गोल गर्न सफल भएको थियो । त्यसैले, खेलमा जुनसुकै समयमा पनि गोल गर्ने क्षमता राख्ने टिमका रूपमा समेत रहन सफल भयो ।

बेल्जियमका प्रशिक्षक रोबर्टो मार्टिनेजले शुक्रबार हुने ब्राजिलबिरुद्धको क्वार्टरफाइनल खेलमा ‘पावर गेम’को आवश्यकता पर्ने स्वीकार गरेका छन् । त्यसैले उनी मराउन फेलानीलाई सुरुआती टोलीमा राख्ने सम्भावना छ ।

‘एक प्रशिक्षकका रुपमा मसँग धेरै बिकल्पहरु छन्, र त्यसलाई कतिबेला प्रयोग गर्ने मलाई थाहा छ ।’ प्रशिक्षक मार्टिनेजले भने, ‘हामी बढी फिजिकल हुनुपर्नेछ । तथा, सोमबारकै मानसिकतामा खेल्यौं भने हामी जित्न सक्छौं । हाम्रा अगाडि ठूलो अवसर छ ।’

यता ब्राजिल छैटौं पटक विश्वकप जित्ने अभियानमा छ । सन् १९९० यता कम्तिमा विश्वकपको क्वार्टरफाइनलमा पुगेको ब्राजिल अघिकांश युवा खेलाडीको भरमा छ र उपाधिको प्रमुख दावेदारको रुपमा हेरिएको छ ।

ब्राजिलियन प्रशिक्षक टिटेले बेल्जिमसंगको खेललाई सहज रुपमा नलिएको प्रतिक्रिया दिएका छन् । उनले भनेका छन्– बेल्जियम हाम्राम लागि चुनौतिपूर्ण टिम हो तर हाम्रा खेलाडीले उनीहरुको चुनौती सहजै चिर्नेछन् । उनले आजको खेलमा ब्राजिल फरक रणनीतिका साथ मैदानमा आउने उनले बताएका छन् । आजको खेलमा ब्राजिल आक्रामकभन्दा संयमित रहनेछ ।

१६ वर्षपछि पहिलो भेट

२००२ को विश्वकपमा ब्राजिल र बेल्जियम प्रतिस्पर्धा गरेयता दुवै टिमले एक अर्का्विरुद्ध प्रतिस्पर्धा गरेका छैनन् । बेल्जियमको ब्राजिलसँगको इतिहास राम्रो छैन । १९६३ मा बेल्जियम ५-१ ले विजयी भएको थियो । त्यसपछि तीन प्रतिःपर्धामा सबै तीनमा ब्राजिल विजयी भएको छ ।