अखबार : नियुक्ति खारेज गर्ने निर्णयको असर कहाँसम्म ?  

काठमाडौं- राजधानीबाट प्रकाशित शुक्रबारका राष्ट्रिय दैनिक पत्रिकाहरुले सरकारले भदौ १४ पछि भएका राजनीतिक नियुक्ति बदर गर्ने भनि गरेको निर्णय र त्यसले उत्पन्न गरेको तरङ्गलाई मुख्य समाचार बनाएका छन् । 

बुधबारको मन्त्रिपरिषद् बैठकले प्रदेशसभा, प्रतिनिधिसभा र राष्ट्रिय सभाको निर्वाचनका लागि निर्वाचन आयोगले आचार संहिता लागु गरेपछि गरिएका सबै राजनीनिक निुक्ति खारेज गर्ने निर्णय गरेको थियो ।

यसैविषयलाई मुख्य समाचार बनाउँदै आजको नागरिक दैनिकले देउवा सरकारका नियुक्ति खारेज शीर्षकमा मुख्य समाचार छापेको छ भने अन्नपूर्ण पोस्टले नियुक्ति बदर विवादमा शीर्षकमा खबर लेखेको छ । 

नयाँ पत्रिका दैनिकले भने हतारमा राजनीतिक नियुक्ति खारेज गर्ने निर्याय गरेपनि नियुक्ति पाएकाहरुको विवरण संकलनको काम भने बल्ल सुरु भएको उल्लेख गरेको छ । सरकार आफै कुन–कुन नियुक्ति खारेज गर्ने भन्ने विषयमा स्पस्ट नभएको पनि नयाँ पत्रिकाले लेखेको छ । 

कान्तिपुर दैनिकले भने सरकारले राजनीतिक नियुक्ति खारेज गर्ने निर्णयसंगै प्रदेश प्रमुखलाई पनि हटाउने तयारी भएको विषयलाई मुख्य समाचार बनाएको छ । आचार संहिता लागु भएपछि गरिएका सबै निर्णय खारेज गर्ने मन्त्रिपरिषद्को निर्णयसंगै देउवा नेतृत्वको सरकारले गरेका प्रदेश प्रमुखसमेत पदमुक्ति प्रक्रियामा गएको समाचारमा उल्लेख छ ।  कान्तिपुरका अनुसार अब मन्त्रिपरिषद्ले उनीहरुलाई पदमुक्त गर्न राष्ट्रपतिसमक्ष सिफारिस गर्नेछ । 

यसैगरि आजका पत्रपत्रिकाले सरकारले घटुवा गरिदिने चेतावनी दिएपछि सशस्त्रका पाँच एआइजीले राजीनामा गरेको विषयलाई पनि प्राथमिकताका साथ छापेका छन् । सरकारको निर्णयका विषयमा टिप्पणी गर्दै प्रमुख प्रतिपक्षि दल नेपाली कांग्रेसले सरकारकारले द्वन्द्वको आमन्त्रण गरेको बताएको छ । सरकारको कदम स्थापित कानुनी मान्यता विपरित भएको कांग्रेसको ठहर छ । आज पत्रपत्रिकाले लेखेका छन् ।